سانكت-پەتەربۋرگ سوتى 23 جاستاعى قازاقستان ازاماتى گارري ازارياندى ەكى ايعا، ياعني 14 شىلدەگە دەيىن قاماۋعا الۋ تۋرالى شەشىم شىعاردى. رەسەيلىك باق-تىڭ حابارلاۋىنشا، وعان تەرروريزمدى جاريا تۇردە اقتادى جانە ناسيحاتتادى دەگەن ايىپ تاعىلىپ وتىر، دەپ حابارلايدى Dalanews.kz.
اتالعان ءىس رەسەيلىك Telegram-ارنالارىندا “تروسكيشىلەر ءىسى” دەپ اتالا باستادى — سەبەبى بۇل تەرگەۋ اياسىندا ازارياننان بولەك تاعى التى ستۋدەنت تۇتقىندالعان.
گارري سوتتا ءوز كىناسىن مويىنداماي، بارلىعىن اشىق ايتىپ تۇسىندىرۋگە دايىن ەكەنىن مالىمدەدى:
"مەن كىنالى ەكەنىمدى مويىندامايمىن. كەرىسىنشە، كىناسىز ەكەنىمدى دالەلدەۋگە دايىنمىن. تەرگەۋدەن قاشۋ نەمەسە كەدەرگى كەلتىرۋ ويىمدا جوق. قوعامعا تىكەلەي ءقاۋىپ ءتوندىرىپ تۇرعان جوقپىن دەپ ويلايمىن. تۇرىپ جاتقان جەرىم — جاتاقحانا — بەينەباقىلاۋمەن قامتىلعان، ارنايى وتكىزۋ جۇيەسى دە بار. ياعني مەنىڭ ءجۇرىس-تۇرىسىمدى باقىلاۋ وڭاي"، — دەگەن ونىڭ ءسوزىن «بۋماگا» ارناسى كەلتىرەدى.
"روتوندا" تەلەگرام ارناسىنىڭ جازۋىنشا، گارري — قازاقستان ازاماتى، سانكت-پەتەربۋرگ مەملەكەتتىك ۋنيۆەرسيتەتىنىڭ ماگيستراتۋراسىندا ساياساتتانۋ ماماندىعى بويىنشا ءبىلىم الادى. ول پەتەرگوفتاعى جاتاقحانادا تۇرىپ، بوس ۋاقىتىندا “يحي-وحي” اتتى بي كلۋبىن جۇرگىزەدى. كلۋب اتاۋى شوتلاند تىلىنەن "مۇندا دا ەمەس، وندا دا ەمەس" دەپ اۋدارىلادى.
