Resei biligi Dúniejúzilik densaýlyq saqtaý uiymyna (DDSU) Irkýtsk qalasynda oba aýrýynyń birde-bir jaǵdaiy anyqtalmaǵanyn habarlady. Marqummen bailanysta bolǵan adamdardyń kópshiligi karantinnen shyǵarylyp, úilerine qaitarylǵan. Uiym ázirge infektsiianyń taralý belgilerin baiqamaǵan jáne Reseidegi epidemiologiialyq táýekel deńgeiin tómen dep baǵalap otyr, dep habarlaidy dalanews.kz.
Bul týraly Reuters agenttigi habarlady. 6 qazanda Jenevada ótken brifingte DDSU ókili Kristian Lindmaier Resei tarapynan berilgen resmi aqparatty jariia etti.
«Resei Federatsiiasynyń Irkýtsk qalasynda bul qaýipti aýrýdyń birde-bir jaǵdaiy tirkelgen joq», – delingen habarlamada.
Onyń aitýynsha, qaitys bolǵan áielmen bailanysta bolǵan adamdardyń barlyǵy anyqtalyp, dárigerlerdiń baqylaýyna alynǵan. Qazirgi ýaqytta olardyń eshqaisysynan aýrý belgileri baiqalmaǵan. DDSU baǵalaýynsha, Irkýtsk qalasyndaǵy epidemiologiialyq qaýip deńgeii – «ortashadan tómenge deiin», Reseidiń basqa óńirleri úshin – «tómen», al Eýropa aýmaǵy úshin – «óte tómen».
Rospotrebnadzor ne deidi?
Reseidiń sanitarlyq qyzmeti – Rospotrebnadzor da sońǵy on kún ishinde obaǵa qarsy ǵylymi-zertteý institýtynyń qyzmetkerleri arasynda juqpaly aýrý jaǵdailary tirkelmegenin málimdedi. Vedomstvonyń habarlaýynsha, qaitys bolǵan áieldiń aǵzasyna júrgizilgen qosymsha zertteýler onyń kásibi qyzmetine bailanysty qaýipti mikroorganizmderdiń bolmaǵanyn kórsetken.
Marqummen bailanysta bolǵan adamdar meditsinalyq baqylaýǵa alynyp, kún saiyn zerthanalyq tekserýden ótken. Zertteý nátijesinde eki adamnan COVID-19, taǵy eki adamnan rinovirýstyq infektsiia anyqtalǵan. Rospotrebnadzordyń málimetinshe, basqa juqpaly aýrýlardyń qozdyrǵyshtary tabylǵan joq.
