Qazaqstan Úkimeti, QR Ulttyq banki jáne Tristan Oil jetekshi kreditorlarynyń qoldaýyndaǵy Stati tarapy Qazaqstandaǵy munai-gaz aktivteri týraly uzaqqa sozylǵan daýdy retteý protsesin sátti aiaqtady, dep jazady Dalanews.kz.
Bul týraly búgin, QR Ádilet ministrligi habarlady.
"Qol qoiylǵan túpkilikti retteý týraly bul kelisim barlyq aǵymdaǵy daýlardy bolashaqta qaita qozǵaý quqyǵynsyz doǵarýǵa negiz bolyp tabylady. Kelisimniń naqty sharttary qupiia qaldyrylady", delingen ministrlik habarlamasynda.
CEO Argentem Creek Partners Deniel Chapman bul retteý jumysy barlyq taraptar úshin máseleni ádil sheshý jolyn izdeý maqsatynda Qazaqstan Respýblikasy qabyldaǵan tásildi, bul atalǵan el investordyń quqyqtary saqtalatyn oryn bolyp tabylatynyn atap kórsetedi.
"Biz Prezident Qasym-Jomart Toqaevqa sheteldik investorlardyń Qazaqstan týraly túsinigin ózgertýdegi kóshbasshylyǵy úshin alǵys aitamyz. Biz bolashaqta jańa jobalarmen jumys isteýdi asyǵa kútemiz", - dedi ol.
Argentem Creek Partners – Stati taraptarynyń investitsiialyq quraly - Tristan Oil Limited-tiń kreditorlary bolyp tabylatyn naqty qorlardyń investitsiialyq basqarýshysy.
"Uzaqqa sozylǵan daý-damaiǵa núkte qoiylǵannan keiin Qazaqstanda ekonomikany damytý úshin, onyń ishinde investitsiialar tartý arqyly, qosymsha múmkindikter paida bolady. Bul rette, men buryn atap ótkendei, respýblikalyq biýdjetten retteý sheńberinde qarajat paidalanylmady", - dedi Ádilet ministri Azamat Esqaraev.
Aita ketelik, 2018 jyldyń qańtar aiynyń basynda Amsterdam soty moldovan kásipkeriniń shaǵymy boiynsha, "Samuryq-Qazyna" ulttyq ál-aýqat qoryna tiesili KMG Kashagan BV golland kompaniiasynyń 5,2 mlrd dollar bolatyn aktsiiasyn buǵattaý týraly sheshimin ózgerissiz qaldyrdy.
Al bul sot sheshimi 2017 jyldyń 8 qyrkúieginde shyqqan edi. Stokgolm saýda palatasy bastamasymen qurylǵan sot qazaqstandyq tarapqa halyqaralyq mindettemelerin buzyp, Statige zalal keltirgen úshin 500 millionnan astam dollar tóleýdi mindettegen. Al jeltoqsan aiynda Ulttyq qordyń aktivine qyzmet kórsetetin Bank of New York Mellon Qazaqstan ulttyq qorynyń 22 milliard dollaryn buǵattaǵan edi.
Odan soń Ulttyq qordyń aqshasyn retteýshi Ulttyq bank elimizdiń atynan qarsy shaǵym túsirgenin málimdedi. Bizge belgili bolǵandai,Qazaqstan moldovan kásipkeri Stati men onyń sybailastaryn alaiaqtyq áreketteri úshin "Ujymdasqan qylmyspen jáne sybailas jemqorlyqpen kúres týraly" AQSh zańy aiasynda jazaǵa tartýdy surady.
Anatoli Stati "Biz Qazaqstannan ótemaqyny asyqpai, biraq senimdi túrde óndirtip jatyrmyz. Birneshe jyl buryn Qazaqstannyń 1 milliard dollardyń jartysyn tólep qutylatyn múmkindigi bolyp edi. Biraq osy qomaqty shyǵyndardan jeke paida kórgender basqasha sheshim qabyldady", – dep otyrǵan edi.
