Belgili qoǵam qairatkeri, saiasatker Muhtar Taijan Qazaqstanda qosymsha qun salyǵynyń kóbeiýine qarsy shyǵyp, onyń ornyna birneshe usynys aitty, dep habarlaidy Dalanews.kz.
Muhtar Taijannyń sózinshe, birinshiden, “Samuryq-Qazyna” ulttyq ál-aýqat qoryn, sondai-aq onyń qajetsiz enshiles, "nemerelik" jáne "shóberelik" uiymdaryn, eń aldymen, Qazaqstan damý banki men «Damý» qoryn taratý qajet. Bul kompaniialarǵa jumsalatyn shyǵyn jylyna trillion teńgelerdi quraidy.
"Ekinshiden, tabiǵi memlekettik monopoliialardy tikelei beiindi ministrlikterge baǵyndyryp, olardyń tabysyn tikelei memlekettik biýdjetke aýdarý. Bul sharanyń nátijesinde memlekettik qazynaǵa 2 trillion teńgeden astam qarjy túser edi, al qazir ol “Samuryq-Qazyna” holdinginiń shottarynda jinalyp jatyr. Úshinshiden, aýyl sharýashylyǵyna sýbsidiialardy toqtatý nemese edáýir qysqartý qajet. Sońǵy bes jylda osy baǵytqa 15 trillion teńge jumsaldy", deidi saiasatker.
Tórtinshiden, shikizat eksporttaýshylaryna QQS qaitarý tájiribesin toqtatý qajet, óitkeni bul da trillion teńgelerge teń qarjy. Al, besinshiden, fýtbol, hokkei, velosiped komandalaryn jáne basqa da osy tektes uiymdardy qarjylandyrýdy toqtatý. Sebebi bul salaǵa da júzdegen milliard teńge bólinedi.
"Bul usynystar – aiqyn kórinip turǵan sharalar. Áli de basqa joldary bar. Sonymen qatar, QQS mólsherlemesin 20%-ǵa deiin kóterý jáne ony shaǵyn jáne mikrobizneske taratý biýdjetke qosymsha 7,5 trillion teńge túsimin qamtamasyz etpeidi dep qorqamyn. Adamdar biznesin bólshek nemese qolma-qol esep aiyrysýǵa kóship ketýi múmkin", deidi Taijan.
