بەلگىلى قوعام قايراتكەرى، ساياساتكەر مۇحتار تايجان قازاقستاندا قوسىمشا قۇن سالىعىنىڭ كوبەيۋىنە قارسى شىعىپ، ونىڭ ورنىنا بىرنەشە ۇسىنىس ايتتى، دەپ حابارلايدى Dalanews.kz.
مۇحتار تايجاننىڭ سوزىنشە، بىرىنشىدەن، “سامۇرىق-قازىنا” ۇلتتىق ءال-اۋقات قورىن، سونداي-اق ونىڭ قاجەتسىز ەنشىلەس، "نەمەرەلىك" جانە "شوبەرەلىك" ۇيىمدارىن، ەڭ الدىمەن، قازاقستان دامۋ بانكى مەن «دامۋ» قورىن تاراتۋ قاجەت. بۇل كومپانيالارعا جۇمسالاتىن شىعىن جىلىنا تريلليون تەڭگەلەردى قۇرايدى.
"ەكىنشىدەن، تابيعي مەملەكەتتىك مونوپوليالاردى تىكەلەي بەيىندى مينيسترلىكتەرگە باعىندىرىپ، ولاردىڭ تابىسىن تىكەلەي مەملەكەتتىك بيۋدجەتكە اۋدارۋ. بۇل شارانىڭ ناتيجەسىندە مەملەكەتتىك قازىناعا 2 تريلليون تەڭگەدەن استام قارجى تۇسەر ەدى، ال ءقازىر ول “سامۇرىق-قازىنا” حولدينگىنىڭ شوتتارىندا جينالىپ جاتىر. ۇشىنشىدەن، اۋىل شارۋاشىلىعىنا سۋبسيديالاردى توقتاتۋ نەمەسە ەداۋىر قىسقارتۋ قاجەت. سوڭعى بەس جىلدا وسى باعىتقا 15 تريلليون تەڭگە جۇمسالدى"، دەيدى ساياساتكەر.
تورتىنشىدەن، شيكىزات ەكسپورتتاۋشىلارىنا ققس قايتارۋ تاجىريبەسىن توقتاتۋ قاجەت، ويتكەنى بۇل دا تريلليون تەڭگەلەرگە تەڭ قارجى. ال، بەسىنشىدەن، فۋتبول، حوككەي، ۆەلوسيپەد كوماندالارىن جانە باسقا دا وسى تەكتەس ۇيىمداردى قارجىلاندىرۋدى توقتاتۋ. سەبەبى بۇل سالاعا دا جۇزدەگەن ميلليارد تەڭگە بولىنەدى.
"بۇل ۇسىنىستار – ايقىن كورىنىپ تۇرعان شارالار. ءالى دە باسقا جولدارى بار. سونىمەن قاتار، ققس مولشەرلەمەسىن 20%-عا دەيىن كوتەرۋ جانە ونى شاعىن جانە ميكروبيزنەسكە تاراتۋ بيۋدجەتكە قوسىمشا 7،5 تريلليون تەڭگە ءتۇسىمىن قامتاماسىز ەتپەيدى دەپ قورقامىن. ادامدار بيزنەسىن بولشەك نەمەسە قولما-قول ەسەپ ايىرىسۋعا كوشىپ كەتۋى مۇمكىن"، دەيدى تايجان.
