Qytai tarifter soǵysyna jaýap retinde amerikalyq taýarlarǵa baj engizgen soń álemdik naryqtar "qyzyl aimaqtan" bir-aq shyqty. Munai arzandap, tipti iri korporatsiia aktsiialarynyń ózi jappai satylymǵa shyǵarylyp, álemdik qor indeksteri tómendep qoia berdi, dep habarlaidy Dalanews.kz.
Juma kúni Qytai amerikalyq taýarlarǵa shaǵylystyrý tásilimen qarsy tarifter belgilegen soń munai baǵasy 6,5%-ǵa tómendep, saýda soǵysyn ýshyqtyryp qana qoimai, álemdik ekonomikadaǵy retsessiia qaýpin arttyrdy, dep habarlaidy Qazaqstan qarjygerler qaýymdastyǵy (QQQ).
"Ótken aptanyń qorytyndysy boiynsha Brent markaly munai 10,9%, al WTI 10,6% arzandady. Baǵanyń bulaisha tómendeýine túrtki negizgi faktor tariftik shekteýler jahandyq ekonomikany álsiretedi degen investorlar úreii bolyp tabylady. Oǵan OPEK+ elderiniń munai óndirisin ulǵaitý jónindegi jospary qosymsha qysym jasaýda, al qysqa merzimdi perspektivadaǵy negizgi táýekelderdiń qatarynda Qytaiǵa basqa elder de qosylyp, tarifter soǵysyna jaýap qatý yqtimaldylyǵy da jatady", - deidi qaýymdastyq sarapshylary.
Birja indeksteri de "kúsh alyp kele jatqan jahandyq saýda soǵysy korporativtik kiristerge soqqy bolyp, ekonomikalyq ósimdi tejeidi" degen boljamdy úrei men qorqynysh aiasynda 5,5–6% tómendedi. Qytai búkil amerikalyq importqa 34% baj salyǵyn engizetinin jariialaǵan soń jappai satylym qarqyndy júre bastady.
Sonymen qatar, Beijiń AQSh-pen saýdany shekteýge baǵyttalǵan qosymsha sharalardy da engizdi. Investorlar FRJ tóraǵasy Djerom Paýelldiń málimdemesine de nazar salýda. Ol Amerika ekonomikasy turaqty, biraq Aq úidiń júzege asyryp jatqan agressivti saýda saiasaty aiasynda bolashaqqa qatysty dúdamal jait týyndap otyrǵanyn jasyrmady.
Paýelldiń aitýynsha, ósimniń baiaýlap, infliatsiianyń údeý qaýpi artqan. Biraq ol FRJ "paiyzdyq saiasatty qaita qarastyrmas buryn áliptiń artyn baǵyp, aiqyn jaǵdaiǵa jetkenshe kúte alatyn jaqsy pozitsiiada ekenin de jetkizdi.
"Degenmen naryqtarda quldyraý búgingi saýda-sattyqta da jalǵasýda: aziialyq qordyń negizgi indeksteri bir sátte 4-11% joǵaltty, al amerikalyq qor indeksteriniń fiýchersteri taǵy 3-5%-ǵa tómendedi", - deidi QQQ.
Sonymen qatar, álemdik naryqtaǵy oqiǵalar qazaqstandyq emitentterdiń aktsiialaryna da qysym kórsetti.
Juma kúngi saýda-sattyq qorytyndysy boiynsha KASE indeksi 5 522,8 tarmaqqa deiin tómendedi (-2,72%). Barlyq qazaqstandyq "kók fishkalar" teris mánge ie boldy. Qatty quldyraýǵa ushyraǵan Halyq bankiniń (-8,4%), Kaspi (-2,8%), TsKB (-2,5%), Air Astana (-2,2%) jáne Qazatomónerkásiptiń (-1,8%) aktsiialary boldy.
Sonymen qatar, aqshasyn ár jerden ala qashqan investorlar áli de AQSh-tyń memlekettik baǵaly qaǵazdaryna qyzyǵýshylyq tanytýda. Máselen, 10 jyldyq qazynashylyq obligatsiialardyń etalondyq kiristiligi jumada 4%-ǵa deiin tómendedi, al qazirgi ýaqytta 3,93% belgisinde tur.
Juma kúni altyn 2,8% qunyn joǵaltty. Degenmen, sarapshylar qymbat metall táýekeldi aktivterden kelgen ótimdilik aǵyny keltirilgen shyǵyndardy áli qalpyna keltire alady dep sanaidy.
Aita keteiik, 2 sáýirde AQSh prezidenti Donald Tramp 180-nen astam elge qatysty baj salyǵyn engizgenin jariialady. Onyń ishinde baj salyǵynyń kólemi 27%-dy quraǵan Qazaqstan da bar.
Buǵan deiin saitymyzda "Altyn qymbattap, munai arzandap jatyr". Tramp pen arabtar shynymen de tize qosty ma?" degen maqala jariialanǵan bolatyn.Sondai-aq saitymyzdan "AQSh-tyń baj salyǵy kimge, qalai áser etedi - sarapshylar pikiri" degen materialdy da oqi alasyzdar. Maman Tramptyń saýda soǵysy Ulttyq qordyń qai tusyna qaýip tóndiretinin de aitqan edi.
