Әлемдік нарықта мұнайдың бір баррелінің құны 1 немесе 2 емес, бақандай 7 пайызға бір-ақ "құлады". Сөйтіп 2024 жылғы ең төменгі шекке барып алды: 69,6 доллар. Сарапшылар бұған ОПЕК+ ұйымының мамыр айында мұнай өндірісі көлемін бір емес, үш есе арттыру туралы жоспары әсер еткенін бір ауыздан құптайды. Осы жағынан алғанда, "АҚШ президенті Дональд Трамп пен араб елдері мұнай бағасын түсіру үшін тізе қосты" деген пайымдар да аракідік айтылып қалуда. Ал инвесторлар жаппай алтын құймасын сатып алуға лап қойып, әлемдік нарықтағы оның құны, керісінше шарықтап жатыр, деп хабарлайды Dalanews.kz.
Onyx Commodities Ltd-ның мұнай саласын зерттеу және талдау бөлімінің басшысы Гарри Чилингирян ОПЕК+ мұнай өндірісі көлемін арттыруға қолайсыз кезеңді таңдап алғанына баса назар аудартады, деп жазады РБК.
"АҚШ президенті Дональд Трамптың қосымша баждар енгізіп жатқанда мұнай өндірісі көлемін арттыру аталған шикізат құнын одан әрі төмендетеді", - дейді ол. Ал ресейлік "БКС Мир инвестиций" ұйымының сарапшылары ОПЕК+ ұйымының мамыр айында өндірісті тәулігіне 411 мың баррельге арттыру туралы шешімі нарық ойыншылары үшін тосын сый болғанын айтады.
"Жоспарға сай "қара алтын" өндірісі тәулігіне 135 мың баррельге өсуі тиіс еді. Оның үш есеге ұлғаятынын ешкім күтпеді. Әрине, мұндай шешімнің бағаға теріс әсері болады. Бірақ соған қарамастан біз Brent маркасының бір баррелі 2025 жылы 70 доллар маңайында болады деген болжамымыздың күшін сақтаймыз. Керісінше, бағаға қысым жылдың екінші жартысында күшейеді ме деп ойлап отырмыз", - дейді ондағылар.
Ал алтынның бағасы, керісінше шарықтай түсуде. Чикаго тауар биржасында маусымдағы алтын фьючерстерінің құны алғаш рет 3200 доллардан асты.
"Алтын құймалары баж салығынан босатылған бірнеше тауарлардың қатарынан болады. Инвесторлар Трамптың сауда соғысының әлемдік экономикаға әсеріне қатысты алаңдаушылық аясында алтынға белсенді түрде инвестиция жасауда. Алтын 2025 жылдың басынан бастап 20%-ға қымбаттап, 2024 жылдағы өсім қарқынымен алға жылжуда. Бұған Орталық банктер мен Азиядағы алтынға деген тұрақты сұраныс ықпал етті", деп жазады Bloomberg.
Deutsche Bank сарапшысы Майкл Сюэ алтынға деген жоғары сұраныс алда да сақталады, бұған орталық банктердің, алтын құймаларымен қамтамасыз етілген биржалық қорлардың жаңа сұранысы және Қытайдағы сақтандыру компанияларының өз активтерінің едәуір бөлігін бағалы металдарға инвестициялау мүмкіндігі қосымша қолдау көрсетеді деп санайды.
Дүниежүзілік Алтын кеңесінің (World Gold Council) мәліметтері бойынша, 2025 жылдың басынан бастап әлемнің әртүрлі елдерінің орталық банктері 18 тонна алтын сатып алған. Оның 4 тоннасын ҚР Ұлттық Банкі сатып алыпты. Өзбекстан (сегіз тонна) мен Қытайдан (бес тонна) кейін бағалы металды сатып алу көлемі бойынша Қазақстан үшінші орында тұр. Алтын қорын құрушы басқа елдер қатарында Польша, Үндістан, Чехия және Катар да бар. Бірақ Қырғызстан, Иордания және Ресей, керісінше металл сатумен айналысқан.
"Қазақстанның Ұлттық Банкі өзінің алтын қорын төрт тоннамен толықтырды. 17 қаңтарда өткен баспасөз брифингінде Ұлттық Банк төрағасы Тимур Сүлейменов халықаралық резервтерді ұлғайту және экономиканы сыртқы күйзелістерден қорғау мақсатында алтын сатып алу арқылы монетарлық бейтараптыққа көшу жайын талқылап жатқанын айтып еді. Ұлттық банк алтын сатып алу операцияларын "шағылыстыру" шарасы аясында доллар сата да бастады. Қазақстанның алтын қоры 288 тоннаны, резервтердің жалпы көлемінің 55% -ын құрайды", делінген World Gold Council хабарламасында.
