Qazaqstanda otbasylardyń nesie men qaryzdy óteýge jumsaityn shyǵyny artyp keledi. Ásirese Astana turǵyndary bul maqsatqa almatylyqtarǵa qaraǵanda bes ese kóp qarjy jumsaidy, dep habarlaidy dalanews.kz LS basylymyna silteme jasap.
2025 jyldyń qorytyndysy boiynsha bir úi sharýashylyǵynyń ortasha tabysy 4,7 mln teńgeni quraǵan. Bul ótken jylmen salystyrǵanda 7,4%-ǵa kóp. Orta eseppen bir otbasynyń ai saiynǵy tabysy 396,5 myń teńgege jetken.
Alaida shyǵyn kólemi budan da jyldam ósken. Ulttyq statistika biýrosynyń málimetinshe, bir otbasynyń jyldyq shyǵyny 8%-ǵa artyp, 4,2 mln teńgege jetken. Ai saiynǵy shyǵyn kólemi shamamen 352,3 myń teńgeni quraǵan.
Otbasy biýdjetiniń jartysyna jýyǵy burynǵydai azyq-túlikke jumsalady. Bul baǵyttaǵy shyǵyn jylyna orta eseppen 2,2 mln teńgege jetip, 11,2%-ǵa ósken.
Azyq-túlikke eń kóp qarjy Mańǵystaý jáne Túrkistan oblystarynyń turǵyndary jumsaǵan - ár óńirde shamamen 2,6 mln teńge. Ulytaý oblysynda bul kórsetkish 2,5 mln teńge bolǵan.
Megapolister arasynda azyq-túlikke eń kóp aqsha jumsaityn qala - Almaty. Munda turǵyndar jylyna 2,4 mln teńge jumsaǵan. Astanada bul kórsetkish 2,3 mln teńge bolsa, Shymkentte 1,9 mln teńge bolǵan.
Azyq-túlikten bólek taýarlarǵa qazaqstandyqtar orta eseppen jylyna 880,2 myń teńge jumsaǵan. Bul ótken jylmen salystyrǵanda nebári 0,5%-ǵa kóp. Mundai taýarlarǵa eń kóp qarjy Ulytaý oblysynda ketken - 1,2 mln teńge.
Al Astanada azyq-túlikke jatpaityn taýarlarǵa ketetin shyǵyn aitarlyqtai qysqarǵan. Kórsetkish birden 16,3%-ǵa tómendep, 886,9 myń teńgeni quraǵan. Bul Almatydaǵy deńgeiden tómen. Almaty turǵyndary mundai satyp alýlarǵa 903,1 myń teńge jumsaǵan.
Aqyly qyzmetterge ketetin shyǵyn da artqan. Qazaqstandyq otbasylar bul maqsatqa jylyna orta eseppen 785,3 myń teńge jumsaǵan. Eń joǵary kórsetkish Almaty men Astanada tirkelgen - shamamen 1,1 mln teńge. Qaraǵandy oblysynda aqyly qyzmetterge 904,6 myń teńge ketken.
Sarapshylar otbasy biýdjetine túsetin negizgi salmaqtyń biri nesie tólemderi ekenin atap ótedi. Qazaqstan boiynsha qaryz ben nesieni óteýge orta eseppen jylyna 275,5 myń teńge jumsalǵan.
Alaida Ulytaý oblysynda bul kórsetkish respýblika boiynsha ortasha deńgeiden birneshe ese joǵary bolǵan. Óńir turǵyndary jylyna shamamen 1 mln teńgeni nesie tólemderine jumsaǵan. Bul eldegi ortasha kórsetkishten 3,7 ese kóp.
Nesie tólemderiniń joǵary kólemi Qyzylorda oblysynda da baiqalǵan - 536,7 myń teńge. Qaraǵandy oblysynda bul kórsetkish 518,8 myń teńge bolǵan.
Iri qalalarda nesiege ketetin shyǵyn keibir óńirlermen salystyrǵanda tómen bolǵanymen, Astanadaǵy kórsetkish el boiynsha eń joǵary deńgeige jaqyn. Elorda turǵyndary jylyna orta eseppen 460,2 myń teńgeni qaryz jabýǵa jumsaǵan.
Al Almatyda nesie men qaryzdy óteýge nebári 87,4 myń teńge ketken. Shymkentte bul kórsetkish odan da tómen - 55,9 myń teńge.
Aita keteiik, zertteý 11,7 myńnan astam úi sharýashylyǵyn qamtyǵan iriktemeli saýalnama negizinde júrgizilgen.
