Qazaqstan qarjygerler qaýymdastyǵynyń deregine súiensek, 2025 jyly el turǵyndary bankomattar arqyly 27,3 trln teńge qolma-qol aqsha alǵan. Bul kórsetkish byltyrǵymen salystyrǵanda 8%-ǵa joǵary, dep habarlaidy Dalanews.kz.
Bir jyl ishinde bank kartalary arqyly jasalatyn qolma-qolsyz tólemder 13%-ǵa ósip, 186 trln teńgege jetti. Degenmen olardyń jalpy tólemderdegi úlesi kóp ózgermei, nebári 86,7%-dan 87,2%-ǵa ǵana artqan. Sarapshylar muny iri qalalarda qolma-qolsyz tólemderdiń keńinen taralyp, naryqtyń birshama qanyqqanymen jáne keibir esep aiyrysýlardyń áli de qolma-qol jasalatynymen túsindiredi.
Sonymen qatar ainalymdaǵy qolma-qol aqsha kólemi de kóbeiip, 4,7 trln teńgege jetti. Bul bir jylda 8,6%-ǵa óskenin kórsetedi. Iaǵni tsifrlyq tólemder damyǵanymen, qolma-qol aqsha áli de kúndelikti qoldanystan tolyq shyqqan joq.
Sondai-aq qolma-qolsyz tólemderdiń qurylymy da birtindep ózgerip jatyr. QR arqyly tóleý úlesi 9,8%-dan 10,3%-ǵa deiin ósken. Al POS-terminal arqyly jasalatyn tólemder aitarlyqtai ózgermei, 9,5%-dan 9,6%-ǵa ǵana kóterilgen. Internet arqyly tóleý burynǵydai negizgi úlesti saqtap otyr, biraq onyń úlesi 80,7%-dan 80%-ǵa sál tómendegen.
