Samsung teledidarlarynyń qazirgi modelderin, sonyń ishinde premiým-seriialaryn shyǵarý týraly kelisimge qol qoiyldy. Óndiris Qaraǵandy oblysy, Saran qalasyndaǵy Silk Road Electronics kásipornynda ornalaspaq. Bul joba Qazaqstan men Ortalyq Aziiada joǵary tehnologiialyq ónimge degen ósip kele jatqan suranysty qanaǵattandyrýǵa múmkindik beredi, dep habarlaidy Dalanews.kz.
"Samsung Electronics tutynýshylyq elektronika salasyndaǵy tehnologiialyq kóshbasshy retinde tutynýshylarǵa zamanaýi tehnologiialar men erekshe paidalanýshy tájiribesin usynyp keledi. Endi Qazaqstanda óndiristiń iske qosylýy bizdiń kompaniia úshin mańyzdy oqiǵa bolmaq. Bul jergilikti naryqqa jaqyndai túsýge jáne ónimderimizdiń qoljetimdiligin arttyrýǵa septigin tigizedi", – dedi Samsung Electronics Central Eurasia prezidenti Djong Iýdjin hanym.
Joba aiasynda óndiristi lokalizatsiialaý jańa jumys oryndaryn ashýǵa jáne óndiristik infraqurylymdy damytýǵa jaǵdai jasaidy.
"Bul yntymaqtastyq bizdiń zaýyt úshin ǵana emes, jalpy Qazaqstannyń indýstriialyq damýy úshin de jańa múmkindikter ashady. Samsung Electronics kompaniiasymen birlese otyryp, otandyq tutynýshylarǵa álemdik deńgeidegi ónimderdi qoljetimdi baǵamen usyna alamyz", – dedi Silk Road Electronics zaýytynyń direktory Aleksandr Kritskii.
Joba Ónerkásipti damytý qorynyń qoldaýymen júzege asyrylyp jatyr. Óndiristi 2025 jyldyń ekinshi toqsanynda iske qosý josparlanyp otyr. Qazaqstanda jasalǵan alǵashqy Samsung teledidarlary sol jyldyń ekinshi jartysynda satylymǵa shyǵady.
