Ulttyq qaýipsizdik komiteti málimetinshe, sáýir-mamyr ailarynda tergelgen qylmystyq ister aiasynda terrorizm jáne ekstremizmge qatysty qylmystar úshin 13 adam sottalǵan, dep habarlaidy dalanews.kz.
Olardyń arasynda Astana turǵyny da bar. Tergeý deregine súiensek, ol áleýmettik jelide terroristik ideologiiany nasihattap, adamdardy terroristik aimaqtarǵa barýǵa úgittegen. Sot ony 8 jylǵa bas bostandyǵynan aiyrdy.
Sondai-aq, Shymkent qalasynyń týmasy Qazaqstanda teokratiialyq memleket qurýǵa shaqyryp, terrorizm ideialaryn taratqany úshin kináli dep tanyldy. Sot oǵan 7 jylǵa bas bostandyǵynan aiyrý jazasyn taǵaiyndady.
Budan bólek, Astana, Almaty, Shymkent qalalarynda jáne Atyraý, Aqtóbe, Jambyl, Qaraǵandy, Túrkistan, Abai oblystarynda ekstremizm men terrorizmge qatysty qylmystar jasady degen kúdikpen 11 adam ustalǵan. Olardyń qatarynda eki shetel azamaty men shetelden ekstraditsiialanǵan úsh qazaqstandyq bar.
UQK málimetinshe, kúdiktiler ekstremistik materialdar taratty, adamdardy terroristik aimaqtarǵa barýǵa jáne óz kózqarastarymen kelispeitinderge qarsy zorlyq-zombylyq jasaýǵa úndedi degen kúdikke ilingen. Qazir sotqa deiingi tergeý jalǵasyp jatyr.
