2026 jyldyń qańtarynda Qazaqstanda turǵyn úi naryǵyndaǵy belsendilik aitarlyqtai tómendedi. Resmi derekke sáikes, bir ai ishinde satyp alý-satý mámileleriniń sany shamamen 48%-ǵa qysqarǵan, dep habarlaidy Dalanews.kz.
Ulttyq biýro málimetinshe, qańtarda el boiynsha 27 745 turǵyn úi mámilesi tirkelgen. Al 2025 jyldyń jeltoqsanynda bul kórsetkish 53 128 bolǵan. Qańtardaǵy mámilelerdiń 21 725-i kópqabatty úilerdegi páterlerge, 6 020-sy jeke úilerge tiesili.
Eń kóp mámile tirkelgen óńirler kóshin Astana (5 375 mámile) men Almaty (5 191 mámile) bastady. Úshinshi orynda – Qaraǵandy oblysy (2 241 mámile). Al eń tómen kórsetkish Ulytaý oblysynda tirkelip, nebári 283 mámile jasalǵan.
Jeltoqsanmen salystyrǵanda barlyq óńirde tómendeý baiqaldy. Eń úlken quldyraý Pavlodar oblysynda (–68,1%), Abai oblysynda (–64%) jáne Soltústik Qazaqstan oblysynda (–57,3%) tirkeldi.
Páter naryǵynda mámileler sany bir aida 47,2%-ǵa qysqaryp, naryqtyń 78,3%-yn qurady. Eń belsendi óńirler – Astana, Almaty jáne Qaraǵandy oblysy. Páterler ishinde eń kóp suranys bir bólmeli úilerge túsken.
Jeke úiler segmentinde de aitarlyqtai tómendeý baiqaldy: mámileler sany 49,6%-ǵa qysqaryp, 6 020-ǵa deiin azaidy. Eń úlken quldyraý Abai, Aqtóbe jáne Batys Qazaqstan oblystarynda tirkelgen.
Jyldyq salystyrýda da naryqta tómendeý bar: 2025 jyldyń qańtarymen salystyrǵanda mámileler sany 10,3%-ǵa azaidy. Degenmen Shymkentte kerisinshe ósim baiqalyp, kórsetkish 32,2%-ǵa artqan.
