2026 جىلدىڭ قاڭتارىندا قازاقستاندا تۇرعىن ءۇي نارىعىنداعى بەلسەندىلىك ايتارلىقتاي تومەندەدى. رەسمي دەرەككە سايكەس، ءبىر اي ىشىندە ساتىپ الۋ-ساتۋ مامىلەلەرىنىڭ سانى شامامەن 48%-عا قىسقارعان، دەپ حابارلايدى Dalanews.kz.

ۇلتتىق بيۋرو مالىمەتىنشە، قاڭتاردا ەل بويىنشا 27 745 تۇرعىن ءۇي مامىلەسى تىركەلگەن. ال 2025 جىلدىڭ جەلتوقسانىندا بۇل كورسەتكىش 53 128 بولعان. قاڭتارداعى مامىلەلەردىڭ 21 725ء-ى كوپقاباتتى ۇيلەردەگى پاتەرلەرگە، 6 020-سى جەكە ۇيلەرگە تيەسىلى.

ەڭ كوپ مامىلە تىركەلگەن وڭىرلەر كوشىن استانا (5 375 مامىلە) مەن الماتى (5 191 مامىلە) باستادى. ءۇشىنشى ورىندا – قاراعاندى وبلىسى (2 241 مامىلە). ال ەڭ تومەن كورسەتكىش ۇلىتاۋ وبلىسىندا تىركەلىپ، نەبارى 283 مامىلە جاسالعان.

جەلتوقسانمەن سالىستىرعاندا بارلىق وڭىردە تومەندەۋ بايقالدى. ەڭ ۇلكەن قۇلدىراۋ پاۆلودار وبلىسىندا (–68،1%)، اباي وبلىسىندا (–64%) جانە سولتۇستىك قازاقستان وبلىسىندا (–57،3%) تىركەلدى.

پاتەر نارىعىندا مامىلەلەر سانى ءبىر ايدا 47،2%-عا قىسقارىپ، نارىقتىڭ 78،3%-ىن قۇرادى. ەڭ بەلسەندى وڭىرلەر – استانا، الماتى جانە قاراعاندى وبلىسى. پاتەرلەر ىشىندە ەڭ كوپ سۇرانىس ءبىر بولمەلى ۇيلەرگە تۇسكەن.

جەكە ۇيلەر سەگمەنتىندە دە ايتارلىقتاي تومەندەۋ بايقالدى: مامىلەلەر سانى 49،6%-عا قىسقارىپ، 6 020-عا دەيىن ازايدى. ەڭ ۇلكەن قۇلدىراۋ اباي، اقتوبە جانە باتىس قازاقستان وبلىستارىندا تىركەلگەن.

جىلدىق سالىستىرۋدا دا نارىقتا تومەندەۋ بار: 2025 جىلدىڭ قاڭتارىمەن سالىستىرعاندا مامىلەلەر سانى 10،3%-عا ازايدى. دەگەنمەن شىمكەنتتە كەرىسىنشە ءوسىم بايقالىپ، كورسەتكىش 32،2%-عا ارتقان.