Qazaqstandyq ǵalymdar alǵash ret ózimizdiń otandyq mikrochipti jasap shyǵardy, dep habarlaidy Dalanews.kz.
Bul – elimiz úshin ǵylym men tehnologiiadaǵy jańa dáýirge jasalǵan naqty qadam. Nazarbaev Ýniversitetiniń zertteýshileri elimizdegi alǵashqy mikroprotsessordy qurastyryp, jartylai ótkizgishter indýstriiasyna jol ashty.
Bul mikrochiptiń jasalýyna Nazarbaev Ýniversitetimen birge Qytai ǵylym akademiiasynyń Ýniversiteti, Beijiń ashyq bastapqy kodtar institýty jáne TEXER.AI startapy qoldaý bildirgen.
Jańa chip joǵary ónimdilikti emes, turaqty ári senimdi jumysty talap etetin avtomattandyrylǵan qurylǵylarda, mysaly, logikalyq basqarý kontrollerlerinde qoldanýǵa arnalǵan.
“Daiyn protsessordy ázirlep, synaqtan ótkizý úshin bizge úsh ai ýaqyt qajet boldy. Buǵan deiin de qarapaiym prototipterimiz bar edi, sondyqtan oǵan tez beiimdeldik. Al eń kóp ýaqytty alǵan protsess – mikrochipti naqty óndirý (fabrikatsiia) kezeńi boldy”, – deidi Nazarbaev Ýniversitetiniń Injeneriia jáne tsifrlyq ǵylymdar mektebiniń assistent-professory Nursultan Qabylqas.
Zertteý júrgizýge ýniversitettiń endaýment-qory men Nazarbaev ziiatkerlik mektepteri qolaily jaǵdai jasap, qoldaý kórsetken.
“Bizdiń komandamyz – óte talantty, eńbekqor ári jańalyqqa jany qumar jastar. Olar negizinen Nazarbaev Ýniversitetiniń stýdentteri men túlekteri, ýniversitettiń zerthanalarynda belsendi jumys istep júrgen mamandar”, – dep atap ótti injener.
Osylaisha, Qazaqstan óziniń joǵary tehnologiialar salasyndaǵy alǵashqy mikrochipin jasaý arqyly tsifrlyq damýda mańyzdy mejeni baǵyndyryp otyr. Bul jetistik eldiń ǵylymi-tehnikalyq áleýetin arttyryp, bolashaqta otandyq óndiristi damytýǵa serpin bereri sózsiz.
