Búgin, 16 qazanda Májilistiń plenarlyq otyrysynda Qarjy naryǵyn retteý jáne damytý agenttiginiń tóraǵasy Mádina Ábilqasymova nesielerdi elektrondyq tásilmen berýge tyiym salýǵa qatysty túzetý qoldaý tappaǵanyn aitty, dep habarlaidy Dalanews.kz.
Quzyrly vedomstvo qazaqstandyqtardyń onlain-qyzmetterge júginý múmkindigine shekteý qoiǵysy joq.
"Biz onlain-nesieni tirkeýge tikelei tyiym salýǵa áli erte dep sanaimyz. Onyń ornyna onlain alaiaqtyqpen tiimdi kúresýge múmkindik beretin basqa tetikterdi usynamyz. Qarjygerler qaýymdastyǵymen biz nesiege ótinish berý men ony maquldaý aralyǵyna "salqyndatý kezeńin" engizýdi qarastyryp jatyrmyz. Bul shara joǵary qaýipti operatsiialar jáne halyqtyń belgili bir osal toptary úshin usynylady", - dedi Mádina Ábilqasymova.
QR Ulttyq bank tóraǵasynyń orynbasary Vitalii Týtýshkin onlain-qyzmetter usynysyna tolyqtai tyiym salý kerige ketýdi bildiretinin qadap aitty. Biraq ol banktik qyzmetterdi elektrondyq tásilmen usynýdaǵy baqylaýdy qatańdatý boiynsha usynystarmen kelisetinin jetkizdi.
"2024 jyldyń shilde aiynyń sońynda Antifrod ortalyǵy iske qosyldy. Ortalyq iske qosylǵan sátten bastap shamamen 600 mln teńgeniń 5,5 myńnan astam jaǵdai óńdeldi. 17 mln teńge óz erkimen qaitaryldy. Antifrod ortalyǵynyń jumysyn odan ári kúsheitý alaiaqtyq shemalardyń azaiýyna yqpal etedi. Sonymen qatar UQK-niń Antifrod – ortalyǵyna jáne uialy bailanys operatorlaryna qosylý máselesi pysyqtalýda", - dep atap ótti ol.
Aita ketsek, qazan aiynyń basynda Májilis depýtattary Qazaqstanda kiberqylmys pen jeke málimetterdiń urlanýy jyldan jylǵa artyp kele jatqanyn, odan zardap shegýshiler qatary da ósip jatqanyn, alaida quzyrly organdar bul rette qaýqarsyz ekenin aityp, onlain nesielerge tyiym salýdy usynǵan edi.
Máselen:
- Qazaqstanda onlain-nesiemen bailanysty alaiaqtyq boiynsha 85 qylmystyq istiń 47-sinde sotqa deiingi tergeý sharalary toqtatyldy, al 45 jaǵdaida quqyq buzýshyny anyqtaý múmkin bolmady.
- tólem kartalaryn paidalaný arqyly alaiaqtyqqa qatysty 813 qylmystyq is boiynsha 223 tergeý sharalary toqtatyldy, óitkeni kúdiktilerdi tabý múmkin bolmaǵan.
- 218 jaǵdaida qylmyskerler Qazaqstannan tys jerlerde bolǵan.
"Almaǵan nesiesin bizdiń azamattar nege tóleýi kerek", degen depýtat Magerram Magerramov sol kezde alaiaqtyqtyń osy túriniń odan ári órkendeýine jol bermeý úshin elektrondy nesieleýge tyiym salýdy jáne bankter men memlekettik organdar tarapynan baqylaýdy kúsheitýdi usynǵan bolatyn.
