بۇگىن، 16 قازاندا ءماجىلىستىڭ پلەنارلىق وتىرىسىندا قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا نەسيەلەردى ەلەكتروندىق تاسىلمەن بەرۋگە تىيىم سالۋعا قاتىستى تۇزەتۋ قولداۋ تاپپاعانىن ايتتى، دەپ حابارلايدى Dalanews.kz.

قۇزىرلى ۆەدومستۆو قازاقستاندىقتاردىڭ ونلاين-قىزمەتتەرگە جۇگىنۋ مۇمكىندىگىنە شەكتەۋ قويعىسى جوق.

"ءبىز ونلاين-نەسيەنى تىركەۋگە تىكەلەي تىيىم سالۋعا ءالى ەرتە دەپ سانايمىز. ونىڭ ورنىنا ونلاين الاياقتىقپەن ءتيىمدى كۇرەسۋگە مۇمكىندىك بەرەتىن باسقا تەتىكتەردى ۇسىنامىز. قارجىگەرلەر قاۋىمداستىعىمەن ءبىز نەسيەگە ءوتىنىش بەرۋ مەن ونى ماقۇلداۋ ارالىعىنا "سالقىنداتۋ كەزەڭىن" ەنگىزۋدى قاراستىرىپ جاتىرمىز. بۇل شارا جوعارى ءقاۋىپتى وپەراسيالار جانە حالىقتىڭ بەلگىلى ءبىر وسال توپتارى ءۇشىن ۇسىنىلادى"، - دەدى ءمادينا ءابىلقاسىموۆا.

ق ر ۇلتتىق بانك ءتوراعاسىنىڭ ورىنباسارى ۆيتاليي تۋتۋشكين ونلاين-قىزمەتتەر ۇسىنىسىنا تولىقتاي تىيىم سالۋ كەرىگە كەتۋدى بىلدىرەتىنىن قاداپ ايتتى. ءبىراق ول بانكتىك قىزمەتتەردى ەلەكتروندىق تاسىلمەن ۇسىنۋداعى باقىلاۋدى قاتاڭداتۋ بويىنشا ۇسىنىستارمەن كەلىسەتىنىن جەتكىزدى.  

"2024 جىلدىڭ شىلدە ايىنىڭ سوڭىندا انتيفرود ورتالىعى ىسكە قوسىلدى. ورتالىق ىسكە قوسىلعان ساتتەن باستاپ شامامەن 600 ملن تەڭگەنىڭ 5،5 مىڭنان استام جاعداي وڭدەلدى. 17 ملن تەڭگە ءوز ەركىمەن قايتارىلدى. انتيفرود ورتالىعىنىڭ جۇمىسىن ودان ءارى كۇشەيتۋ الاياقتىق سحەمالاردىڭ ازايۋىنا ىقپال ەتەدى. سونىمەن قاتار ۇقك-نىڭ انتيفرود – ورتالىعىنا جانە ۇيالى بايلانىس وپەراتورلارىنا قوسىلۋ ماسەلەسى پىسىقتالۋدا"، - دەپ اتاپ ءوتتى ول.

ايتا كەتسەك، قازان ايىنىڭ باسىندا ءماجىلىس دەپۋتاتتارى قازاقستاندا كيبەرقىلمىس پەن جەكە مالىمەتتەردىڭ ۇرلانۋى جىلدان جىلعا ارتىپ كەلە جاتقانىن، ودان زارداپ شەگۋشىلەر قاتارى دا ءوسىپ جاتقانىن، الايدا قۇزىرلى ورگاندار بۇل رەتتە قاۋقارسىز ەكەنىن ايتىپ، ونلاين نەسيەلەرگە تىيىم سالۋدى ۇسىنعان ەدى.

ماسەلەن:

• قازاقستاندا ونلاين-نەسيەمەن بايلانىستى الاياقتىق بويىنشا 85 قىلمىستىق ءىستىڭ 47-سىندە سوتقا دەيىنگى تەرگەۋ شارالارى توقتاتىلدى، ال 45 جاعدايدا قۇقىق بۇزۋشىنى انىقتاۋ مۇمكىن بولمادى.
• تولەم كارتالارىن پايدالانۋ ارقىلى الاياقتىققا قاتىستى 813 قىلمىستىق ءىس بويىنشا 223 تەرگەۋ شارالارى توقتاتىلدى، ويتكەنى كۇدىكتىلەردى تابۋ مۇمكىن بولماعان.
• 218 جاعدايدا قىلمىسكەرلەر قازاقستاننان تىس جەرلەردە بولعان.

"الماعان نەسيەسىن ءبىزدىڭ ازاماتتار نەگە تولەۋى كەرەك"، دەگەن دەپۋتات ماگەررام ماگەرراموۆ سول كەزدە الاياقتىقتىڭ وسى ءتۇرىنىڭ ودان ءارى وركەندەۋىنە جول بەرمەۋ ءۇشىن ەلەكتروندى نەسيەلەۋگە تىيىم سالۋدى جانە بانكتەر مەن مەملەكەتتىك ورگاندار تاراپىنان باقىلاۋدى كۇشەيتۋدى ۇسىنعان بولاتىن.