Qazaqstannyń mal sharýashylyǵy salasynda turaqty ósim saqtalyp otyr. Elde iri qara, qoi, jylqy, túie jáne qus sany artyp, et óndirisi de kóbeigen, dep habarlaidy dalanews.kz.
Aýyl sharýashylyǵy ministrliginiń málimetinshe, 2026 jylǵy 1 mamyrdaǵy jaǵdai boiynsha iri qara mal sany 9,8 million basqa jetken. Bul ótken jyldyń sáikes kezeńimen salystyrǵanda 325,2 myń basqa kóp. Qoi sany 23,5 million basqa jetip, bir jylda 363,1 myń basqa artqan. Sonymen qatar jylqy sany 5,1 million basqa (+339,8 myń), túie sany 322 myń basqa (+7,5 myń), al qus sany 48,2 million basqa (+291,5 myń) jetken.
Mal basynyń kóbeiýi óndiris kóleminiń artýyna da áser etken. Biylǵy qańtar-sáýir ailarynda barlyq túrdegi et óndirisi soiys salmaǵymen eseptegende 338,2 myń tonnany qurady. Bul ótken jyldyń osy kezeńimen salystyrǵanda 11 myń tonnaǵa kóp.
Atap aitqanda, siyr eti óndirisi 112,9 myń tonnaǵa jetip, 6,5 myń tonnaǵa ósken. Qoi eti óndirisi 34,7 myń tonnany qurap, 2,6 myń tonnaǵa artqan. Al jylqy eti óndirisi 39,8 myń tonna bolyp, ótken jylmen salystyrǵanda 1,4 myń tonnaǵa kóbeigen.
Vedomstvo salany odan ári damytý úshin jańa qoldaý tetikteri engizilip jatqanyn málimdedi. Solardyń biri – jaiylymdyq mal sharýashylyǵyn damytýǵa arnalǵan «Jailaý» jeńildetilgen nesieleý baǵdarlamasy. Baǵdarlama aiasynda mal ósirýshilerge jaiylym infraqurylymyn damytý úshin jyldyq 6 paiyzben 10 jylǵa deiin nesie berý qarastyrylǵan.
Ministrlik óndiris kóleminiń artýy ishki naryqty negizgi mal sharýashylyǵy ónimderimen qamtamasyz etýge jetkilikti ekenin atap ótti.
Sondai-aq sáýir-mamyr ailarynda baiqalǵan qoi etiniń qymbattaýyna qatysty túsinikteme berildi. Vedomstvo málimetinshe, baǵanyń ósýi ýaqytsha jáne maýsymdyq sipatta bolǵan. Negizgi sebep – Qurban ait merekesi qarsańynda suranystyń dástúrli túrde artýy.
Qazirgi ýaqytta Ulttyq statistika biýrosynyń derekterine sáikes, elimiz boiynsha qoi etiniń ortasha baǵasy bir kelisi úshin 4 209 teńgeni quraidy. Sonymen qatar qoi etiniń satyp alý baǵasy shamamen 200 teńgege tómendegeni tirkelgen.
Osylaisha, qoi eti baǵasynyń kóterilýi ónim tapshylyǵyna bailanysty emes. Óndiris kóleminiń ósýi men mal basynyń kóbeiýi Qazaqstannyń mal sharýashylyǵy salasy turaqty damyp jatqanyn jáne ishki naryqtaǵy usynystyń jetkilikti ekenin kórsetedi.
