Qazaqstanda jyl saiyn myńdaǵan jasóspirim qyz ana atanyp jatyr. Senat depýtaty Nurtóre Júsiptiń málimdeýinshe, 2023 jyly elde 5094 jasóspirim qyz bosanyp, bul kórsetkish jalpy týý sanynyń 1,3%-yn quraǵan, dep habarlaidy Dalanews.kz.
“Pandemiia kezinde jasóspirimder arasyndaǵy týý kórsetkishi kúrt ósken edi. Alaida bul kórsetkish tórt jyldan beri ózgerissiz qalyp otyr. Ótken jyly 5094 jasóspirimniń bosanǵany tirkeldi, bul – jalpy týý sanynyń 1,3%-yn quraidy”, – dedi senator beisenbi kúni Senattyń jalpy otyrysynda depýtattyq saýal joldaý barysynda.
Onyń aitýynsha, aýyldyq jerlerde jasóspirimder arasyndaǵy týý kórsetkishi qalamen salystyrǵanda eki ese joǵary.
Sondai-aq jasóspirim qyzdarǵa qatysty zorlyq-zombylyq oqiǵalarynyń sany artqan. Bul da erte júktilikke áser etýde. Alaida mundai máseleler qoǵamda jii jabýly qazan kúiinde qalyp jatady. Senatordyń pikirinshe, búgingi jasóspirimderdiń reprodýktivti densaýlyǵy aldaǵy 10-15 jyldaǵy týý kórsetkishine jáne el demografiiasyna tikelei yqpal etedi.
Nurtóre Júsip jasóspirimder arasyndaǵy júktiliktiń ósý sebepterin tereń zerttep, bul baǵyttaǵy monitoring pen baqylaýdy kúsheitýdi, kámeletke tolmaǵandardyń quqyqtaryn qorǵaý boiynsha zańnamanyń oryndalýyn qadaǵalaýdy, sondai-aq erte júktiliktiń saldary, jaýapkershilik pen quqyq týraly aqparattyq-aǵartýshylyq jumystardy jandandyrýdy usyndy.
