قازاقستاندا جىل سايىن مىڭداعان ءجاسوسپىرىم قىز انا اتانىپ جاتىر. سەنات دەپۋتاتى نۇرتورە ءجۇسىپتىڭ مالىمدەۋىنشە، 2023 جىلى ەلدە 5094 ءجاسوسپىرىم قىز بوسانىپ، بۇل كورسەتكىش جالپى تۋۋ سانىنىڭ 1،3%-ىن قۇراعان، دەپ حابارلايدى Dalanews.kz.
“پاندەميا كەزىندە جاسوسپىرىمدەر اراسىنداعى تۋۋ كورسەتكىشى كۇرت وسكەن ەدى. الايدا بۇل كورسەتكىش ءتورت جىلدان بەرى وزگەرىسسىز قالىپ وتىر. وتكەن جىلى 5094 ءجاسوسپىرىمنىڭ بوسانعانى تىركەلدى، بۇل – جالپى تۋۋ سانىنىڭ 1،3%-ىن قۇرايدى”، – دەدى سەناتور بەيسەنبى كۇنى سەناتتىڭ جالپى وتىرىسىندا دەپۋتاتتىق ساۋال جولداۋ بارىسىندا.
ونىڭ ايتۋىنشا، اۋىلدىق جەرلەردە جاسوسپىرىمدەر اراسىنداعى تۋۋ كورسەتكىشى قالامەن سالىستىرعاندا ەكى ەسە جوعارى.
سونداي-اق ءجاسوسپىرىم قىزدارعا قاتىستى زورلىق-زومبىلىق وقيعالارىنىڭ سانى ارتقان. بۇل دا ەرتە جۇكتىلىككە اسەر ەتۋدە. الايدا مۇنداي ماسەلەلەر قوعامدا ءجيى جابۋلى قازان كۇيىندە قالىپ جاتادى. سەناتوردىڭ پىكىرىنشە، بۇگىنگى جاسوسپىرىمدەردىڭ رەپرودۋكتيۆتى دەنساۋلىعى الداعى 10-15 جىلداعى تۋۋ كورسەتكىشىنە جانە ەل دەموگرافياسىنا تىكەلەي ىقپال ەتەدى.
نۇرتورە ءجۇسىپ جاسوسپىرىمدەر اراسىنداعى جۇكتىلىكتىڭ ءوسۋ سەبەپتەرىن تەرەڭ زەرتتەپ، بۇل باعىتتاعى مونيتورينگ پەن باقىلاۋدى كۇشەيتۋدى، كامەلەتكە تولماعانداردىڭ قۇقىقتارىن قورعاۋ بويىنشا زاڭنامانىڭ ورىندالۋىن قاداعالاۋدى، سونداي-اق ەرتە جۇكتىلىكتىڭ سالدارى، جاۋاپكەرشىلىك پەن قۇقىق تۋرالى اقپاراتتىق-اعارتۋشىلىق جۇمىستاردى جانداندىرۋدى ۇسىندى.
