Qazaqstan jastary arasynda sońǵy ýaqytta azot totyǵyn (kóbine «kúlki týdyratyn sharikter» retinde belgili) tutyný keń etek alyp keledi. Bul týraly Májilis depýtaty Temir Qyryqbaev óziniń málimdemesinde aityp, máseleniń mańyzdylyǵyna nazar aýdardy, dep habarlaidy Dalanews.kz.
Onyń aitýynsha, bul zat resmi túrde esirtki quraldarynyń tiziminde bolmasa da, nashaqorlyqtyń alǵashqy satysyna ainalyp barady. Meditsinalyq maqsatta qoldanylatyn azot totyǵy búginde meiramhanalar men túngi klýbtarda jastar úshin «kóńil kóterýdiń» bir tásiline ainalǵan.
"Azot totyǵy meditsinalyq protsedýralarda qoldanylatyn kúshti zattardyń qataryna jatady. Alaida ol oiyn-saýyq nysandarynda keńinen taralyp, jastar arasynda asa tanymal bolyp otyr. Bul – óte qaýipti úrdis", – dedi Temir Qyryqbaev.
Meditsina men narkologiia salasynyń mamandarynyń málimetinshe, bul zattyń adam aǵzasyna tigizetin keri áseri kóp.
“Atap aitqanda:
• Júike júiesine zaqym: uzaq ýaqyt qoldaný B12 dárýmeniniń tapshylyǵyn týǵyzyp, aiaq-qoldyń jansyzdanýyna, qozǵalys fýnktsiiasynyń buzylýyna alyp keledi;
• Tynys alý joldaryna áser: ottegi jetispeýshiligi saldarynan tynys tarylýy, esten taný jáne ólim jaǵdailary bolýy múmkin;
• Psihikalyq densaýlyq: este saqtaý qabiletiniń álsireýi, depressiia, oilaý qabiletiniń tómendeýi;
• Júrek-qan tamyr júiesi: júrek yrǵaǵynyń buzylýy, qan qysymynyń turaqsyzdyǵy;
• Táýeldilik: azot totyǵy esirtki sekildi psihologiialyq táýeldilik týdyrýy múmkin”, — deidi ol.
Depýtat bul máseleni memlekettik deńgeide baqylaýǵa alyp, azot totyǵyna zańnamalyq turǵydan shekteý qoiý qajet ekenin aitty.
“Jastardy ýly zattardan qorǵaý – bárimizdiń ortaq mindetimiz. Bul másele shuǵyl sheshim qabyldaýdy talap etedi”, – dedi Májilis depýtaty.
