قازاقستان جاستارى اراسىندا سوڭعى ۋاقىتتا ازوت توتىعىن (كوبىنە «كۇلكى تۋدىراتىن شاريكتەر» رەتىندە بەلگىلى) تۇتىنۋ كەڭ ەتەك الىپ كەلەدى. بۇل تۋرالى ءماجىلىس دەپۋتاتى تەمىر قىرىقبايەۆ ءوزىنىڭ مالىمدەمەسىندە ايتىپ، ماسەلەنىڭ ماڭىزدىلىعىنا نازار اۋداردى، دەپ حابارلايدى Dalanews.kz.

ونىڭ ايتۋىنشا، بۇل زات رەسمي تۇردە ەسىرتكى قۇرالدارىنىڭ تىزىمىندە بولماسا دا، ناشاقورلىقتىڭ العاشقى ساتىسىنا اينالىپ بارادى. مەديسينالىق ماقساتتا قولدانىلاتىن ازوت توتىعى بۇگىندە مەيرامحانالار مەن تۇنگى كلۋبتاردا جاستار ءۇشىن «كوڭىل كوتەرۋدىڭ» ءبىر تاسىلىنە اينالعان.

"ازوت توتىعى مەديسينالىق پروسەدۋرالاردا قولدانىلاتىن كۇشتى زاتتاردىڭ قاتارىنا جاتادى. الايدا ول ويىن-ساۋىق نىساندارىندا كەڭىنەن تارالىپ، جاستار اراسىندا اسا تانىمال بولىپ وتىر. بۇل – وتە ءقاۋىپتى ءۇردىس"، – دەدى تەمىر قىرىقبايەۆ.

مەديسينا مەن ناركولوگيا سالاسىنىڭ ماماندارىنىڭ مالىمەتىنشە، بۇل زاتتىڭ ادام اعزاسىنا تيگىزەتىن كەرى اسەرى كوپ.

“اتاپ ايتقاندا:

• جۇيكە جۇيەسىنە زاقىم: ۇزاق ۋاقىت قولدانۋ B12 دارۋمەنىنىڭ تاپشىلىعىن تۋعىزىپ، اياق-قولدىڭ جانسىزدانۋىنا، قوزعالىس فۋنكسياسىنىڭ بۇزىلۋىنا الىپ كەلەدى؛

• تىنىس الۋ جولدارىنا اسەر: وتتەگى جەتىسپەۋشىلىگى سالدارىنان تىنىس تارىلۋى، ەستەن تانۋ جانە ءولىم جاعدايلارى بولۋى مۇمكىن؛

• پسيحيكالىق دەنساۋلىق: ەستە ساقتاۋ قابىلەتىنىڭ السىرەۋى، دەپرەسسيا، ويلاۋ قابىلەتىنىڭ تومەندەۋى؛

• جۇرەك-قان تامىر جۇيەسى: جۇرەك ىرعاعىنىڭ بۇزىلۋى، قان قىسىمىنىڭ تۇراقسىزدىعى؛

• تاۋەلدىلىك: ازوت توتىعى ەسىرتكى سەكىلدى پسيحولوگيالىق تاۋەلدىلىك تۋدىرۋى مۇمكىن”، — دەيدى ول.

دەپۋتات بۇل ماسەلەنى مەملەكەتتىك دەڭگەيدە باقىلاۋعا الىپ، ازوت توتىعىنا زاڭنامالىق تۇرعىدان شەكتەۋ قويۋ قاجەت ەكەنىن ايتتى.

“جاستاردى ۋلى زاتتاردان قورعاۋ – ءبارىمىزدىڭ ورتاق مىندەتىمىز. بۇل ماسەلە شۇعىل شەشىم قابىلداۋدى تالاپ ەتەدى”، – دەدى ءماجىلىس دەپۋتاتى.