Májilis depýtattary "Qazaqstan Respýblikasyndaǵy bankter jáne bank qyzmeti týraly" zań jobasyn óz qaraýyna aldy. Depýtat Tatiana Saveleva atalǵan zań jobasy Memleket basshysynyń qarjy sektoryn odan ári damytý jónindegi tapsyrmasyn iske asyrý maqsatynda ázirlengenin naqtylady, dep habarlaidy Dalanews.kz.
"Bank qyzmetiniń jalpy erejelerin, maqsattaryn, mindetterin, retteý jáne korporativtik basqarý qaǵidattaryn jetildirý turǵysynda ózgerister engizilýde. Bul búkil bank sektory úshin biryńǵai jáne tiimdi negiz qurýǵa múmkindik beredi. Banktik qadaǵalaý belgilenip, bankterdi ashý jáne litsenziialaý tártibine qoiylatyn talaptar da ózgertilýde", - dedi Saveleva.
Atalǵan bloktaǵy negizgi bastamalardyń biri – bazalyq banktik litsenziiany engizý. Bul naryqqa jańa bankterdiń ený sharttaryn jeńildetedi jáne básekelestikti arttyrady, sonymen qatar biznesti nesielendirýge oń áser etedi. Sonymen qatar qarjy uiymdarynyń basshylary úshin standarttar joǵarylaidy, sondyqtan basshylyqqa tek kásibi daiyndalǵan jáne adal mamandar keledi.
"Sondai-aq, salymshylardyń múddelerin qorǵaý jáne qarjy júiesiniń turaqtylyǵyn saqtaý maqsatynda tólemge qabiletsiz bankterdi retteý tetikteri engizilýde", dep sózin tolyqtyrady depýtat.
Aita ketsek, biylǵy óz halqyna arnaǵan Joldaýynda Memleket basshysy "Bankter týraly" zań jobasyn ázirleýdi tapsyrǵan bolatyn. Sondai-aq Qasym-Jomart Toqaev tsifrlyq aktivterdiń tolyqqandy ekojúiesin tezirek qalyptastyrý kerek ekenin aitty. Bul týraly ekonomist Rýslan Sultanov egjei-tegjeili aityp bergen bolatyn. Ony myna aradan oqi otyryńyzdar.
