19 naýryzdan bastap Qazaqstanda aǵymdaǵy shottarǵa syiaqy esepteýge qaita ruqsat beriledi. Bul shekteý 2019 jyldan beri depozitterdi yntalandyrý úshin engizilgen edi. Sarapshylardyń pikirinshe, ózgeris qarapaiym azamattarǵa aitarlyqtai áser etpeidi, alaida biznes pen bankter úshin munyń mańyzy joǵary, dep habarlaidy Dalanews.kz.
Qazaq Expert Club-tyń qarjy sarapshysy Áigerim Iliiasovanyń aitýynsha, halyqtyń bank kartalarynda ortasha mólsherde qalatyn aqsha - shamamen 200 myń teńge. Jyldyq mólsherleme 1%-ǵa deiin bolsa, bul jylyna nebári 2 myń teńgedei tabys ákeledi. Sondyqtan bul ózgeris salymshylardyń qarjy saqtaý ádetine áser etpeidi.
Onyń ornyna bankter ikemdi depozitter usynyp otyr: qarajatty kez kelgen ýaqytta salyp, sheship alýǵa bolady. Kún saiynǵy qalǵan aqshaǵa paiyz esepteletindikten, aqshany depozitte ustaý áldeqaida tiimdi.
Al negizgi áser bizneske tiedi. Kásiporyndardyń aǵymdaǵy shottarynda iri qarajat saqtalady, sondyqtan syiaqy tóleý bankter úshin qosymsha shyǵynǵa ainalýy múmkin. Bul óz kezeginde nesie qunyna yqpal etýi yqtimal.
Sarapshy memlekettik jáne kvazimemlekettik uiymdarǵa da nazar aýdardy. Olar kóbine biýdjet qarajatyn depozitke sala almaidy, sondyqtan aǵymdaǵy shottaǵy syiaqy olar úshin tiimdi bolýy múmkin.
Mamannyń aitýynsha, bul jańashyldyq bankter úshin mindet emes, tek básekelestik quraly sanalady. Degenmen ol korporativtik klientter úshin tartymdylyqty arttyryp, naryqtaǵy básekeni kúsheitýi múmkin.
