Qazaq Expert Club-تىڭ قارجى ساراپشىسى ايگەرىم ءىلياسوۆانىڭ ايتۋىنشا، حالىقتىڭ بانك كارتالارىندا ورتاشا مولشەردە قالاتىن اقشا - شامامەن 200 مىڭ تەڭگە. جىلدىق مولشەرلەمە 1%-عا دەيىن بولسا، بۇل جىلىنا نەبارى 2 مىڭ تەڭگەدەي تابىس اكەلەدى. سوندىقتان بۇل وزگەرىس سالىمشىلاردىڭ قارجى ساقتاۋ ادەتىنە اسەر ەتپەيدى.

ونىڭ ورنىنا بانكتەر يكەمدى دەپوزيتتەر ۇسىنىپ وتىر: قاراجاتتى كەز كەلگەن ۋاقىتتا سالىپ، شەشىپ الۋعا بولادى. كۇن سايىنعى قالعان اقشاعا پايىز ەسەپتەلەتىندىكتەن، اقشانى دەپوزيتتە ۇستاۋ الدەقايدا ءتيىمدى.

ال نەگىزگى اسەر بيزنەسكە تيەدى. كاسىپورىنداردىڭ اعىمداعى شوتتارىندا ءىرى قاراجات ساقتالادى، سوندىقتان سىياقى تولەۋ بانكتەر ءۇشىن قوسىمشا شىعىنعا اينالۋى مۇمكىن. بۇل ءوز كەزەگىندە نەسيە قۇنىنا ىقپال ەتۋى ىقتيمال.

ساراپشى مەملەكەتتىك جانە كۆازيمەملەكەتتىك ۇيىمدارعا دا نازار اۋداردى. ولار كوبىنە بيۋدجەت قاراجاتىن دەپوزيتكە سالا المايدى، سوندىقتان اعىمداعى شوتتاعى سىياقى ولار ءۇشىن ءتيىمدى بولۋى مۇمكىن.

ماماننىڭ ايتۋىنشا، بۇل جاڭاشىلدىق بانكتەر ءۇشىن مىندەت ەمەس، تەك باسەكەلەستىك قۇرالى سانالادى. دەگەنمەن ول كورپوراتيۆتىك كليەنتتەر ءۇشىن تارتىمدىلىقتى ارتتىرىپ، نارىقتاعى باسەكەنى كۇشەيتۋى مۇمكىن.