Qazaqstan Halyq Keńesiniń músheleri óz qyzmetin qoǵamdyq negizde atqaryp, memlekettik biýdjetten jalaqy almaidy, dep habarlaidy dalanews.kz.
«Qazaqstan Halyq Keńesi týraly» Konstitýtsiialyq zańnyń 14-babynyń 1-tarmaǵyna sáikes, Keńes músheleriniń qyzmeti tek qoǵamdyq negizde júzege asyrylady. Olar depýtattar nemese memlekettik qyzmetshiler bolyp sanalmaidy jáne óz mindetterin óteýsiz atqarady.
Qazaqstan Halyq Keńesiniń músheleri máslihattar men qoǵamdyq keńesterdiń, qoǵamdyq jáne etnomádeni birlestikterdiń ókilderi arasynan usynylady. Olardyń negizgi mindeti – konsýltatsiialar men saraptamalyq baǵalaý arqyly qoǵam úshin mańyzdy bastamalardy iske asyrýǵa yqpal etý.
Osyǵan bailanysty Keńestiń qatardaǵy múshelerine memlekettik biýdjetten jalaqy tólenbeidi.
Al Qazaqstan Halyq Keńesiniń tóraǵasy men onyń Hatshylyǵyn basqaratyn bir orynbasarynyń mártebesi bólek.
Konstitýtsiialyq zańǵa sáikes, tóraǵa Keńestiń qyzmetine jalpy basshylyq jasaidy, normativtik qujattardy bekitedi jáne basqa da strategiialyq ókilettikterdi júzege asyrady. Osyǵan bailanysty tóraǵa men Hatshylyq basshysy jaýapty memlekettik laýazymdy atqaratyn tulǵalar sanalady jáne turaqty negizde jumys isteidi.
Olardyń qyzmeti memlekettik biýdjet esebinen qarjylandyrylady. Sondai-aq Qazaqstan Halyq Keńesi Hatshylyǵynyń memlekettik qyzmetshileriniń eńbekaqysy da biýdjet qarajaty esebinen tólenedi. Hatshylyq Keńestiń uiymdastyrýshylyq, saraptamalyq-taldamalyq jáne aqparattyq jumysyn qamtamasyz etedi.
Buǵan deiin bul másele boiynsha túsiniksizdik týyndaǵan edi. 15 mamyrda Májilis depýtaty Erlan Saiyr Qazaqstan Halyq Keńesiniń 126 múshesi qoǵamdyq negizde jumys isteitinin jáne olarǵa jalaqy tólenbeitinin málimdegen. Ol kezde depýtat Keńes Hatshylyǵy jeke memlekettik organ retinde qurylyp, onyń qyzmetkerleri biýdjet esebinen qarjylandyrylatynyn aitqan.
Alaida 17 qyrkúiekte Qazaqstan Halyq Keńesiniń jumysyna 1,7 mlrd teńge qarastyrylǵany belgili bolǵannan keiin múshelerdiń jalaqysy týraly másele qaita kóterildi. Qarjy vitse-ministri Abzal Beisenbekuly bul qarajattyń tek jalaqyǵa arnalmaǵanyn, onyń quramyna óńirlerge saparlar, halyqpen kezdesýler, forýmdar, sessiialar, qoǵamdyq tyńdaýlar jáne aqparattyq júielerdi súiemeldeý shyǵyndary kiretinin túsindirdi.
Sol kezde jýrnalister naqty jalaqy mólsherin suraǵan. Vitse-ministr eńbekaqy biryńǵai júie boiynsha tólenetinin aityp, naqty somalardy jariialai almaitynyn jetkizdi. Bul jaýap Keńes músheleriniń jalaqysy týraly qosymsha suraqtar týǵyzdy.
Osyǵan bailanysty Qazaqstan Halyq Keńesi taratqan jańa túsindirmede qatardaǵy músheler men Keńes basshylyǵynyń mártebesin ajyratý qajet ekeni naqty kórsetildi: Keńes músheleri qoǵamdyq negizde jumys isteidi, al turaqty negizde qyzmet atqaratyn tóraǵa, Hatshylyq basshysy jáne Hatshylyq qyzmetkerleriniń eńbegi biýdjetten qarjylandyrylady.
