Qytaidyń Beijiń qalasynda ótken Qazaqstan-Qytai iskerlik keńesiniń otyrysynda elimizdegi eń iri kún elektr stantsiialarynyń birin Túrkistan oblysynda salý týraly kelisimge qol qoiyldy,- dep habarlaidy Dalanews.kz
Memleket basshysy Qasym-Jomart Toqaev Beijińde China Energy Engineering Group kompaniiasynyń bas direktory Ni Chjenmen kezdesip, yntymaqtastyqtyń negizgi baǵyttary men birlesken jobalardy júzege asyrý jaiyn talqylady. Kezdesý barysynda elektr jelileri infraqurylymyn jańǵyrtý men keńeitýge, data-ortalyq salýǵa, sondai-aq qaldyqtardy qaita óńdeý arqyly elektr qýatyn óndirý jobasyn júzege asyrýǵa qatysty máseleler qozǵaldy.
Energy China kompaniiasy Qazaqstannyń soltústigi men ońtústigin jalǵaityn turaqty elektr jelileriniń qurylysyn júrgizýge, jańartylatyn energetika jobalaryn iske asyrýǵa niet bildirdi.
Kelissózder nátijesinde quny shamamen 320 mln AQSh dollary bolatyn kún elektr stantsiiasy Túrkistan oblysynyń Saýran aýdanynda salynbaq. Joba 2025–2026 jyldary júzege asyrylady.
Investitsiia qujattaryna jáne elektr energiiasyn satyp alý kelisimine QR Energetika ministrligi men China Energy Engineering Group kompaniiasy qol qoidy. Kelisimge qol qoiý saltanaty Qazaqstan Prezidenti Qasym-Jomart Toqaevtyń qatysýymen ótti. Bul jobanyń strategiialyq mańyzyn aiqyndai túsedi.
Energetika ministri Erlan Ákkenjanov jańa kún elektr stantsiiasy Qazaqstannyń ońtústigindegi energetikalyq qaýipsizdikti nyǵaityp, jańa jumys oryndaryn ashýǵa jáne kómirtegi beitaraptyǵyna qol jetkizýge úles qosatynyna toqtalyp, «jasyl» energetikany damytý jolyndaǵy mańyzdy qadam ekenin aityp ótti.
Aita keteiik, Fortune Global 500 reitingine kiretin halyqaralyq iri kompaniia jel, kún jáne jylý qýatyn óndirý, iadrolyq energetika, sý únemdeý men gidroenergetika salalarynda jumys isteidi.
Kún elektr stantsiiasynyń iske qosylýy elimizdiń energetikalyq balansyn ártaraptandyrýǵa, jańartylatyn energiia kózderiniń úlesin arttyrýǵa jáne Qazaqstannyń «jasyl» ekonomikaǵa kóshý jolyndaǵy óńirlik kóshbasshy retindegi ornyn bekitýge múmkindik beredi.
