"Aq jol" fraktsiiasy músheleri premer-ministr Oljas Bektenovke depýtattyq saýal joldady. Olar kótergen negizgi másele otandyq kino óndirisine qatysty,- dep habarlaidy Dalanews.kz.
Depýtat Qazybek Isanyń aitýynsha, keiingi bir jylda Mádeniet salasy narazylyqtar sherýine, aqparat salasy sottasý alańyna ainalǵan.
Sońǵy 6 aidyń ishinde mádeniet qairatkerleri Memleket basshysy men Parlamentten kómek surap, 6 ret ashyq hat jazǵan.
"12 qarashada eki Eńbek Eri - Asanáli Áshimov pen Dýlat Isabekov bastaǵan, Halyq ártisteri men Halyq jazýshylary qostaǵan áigili mádeniet qairatkerleri kino salasyndaǵy qalyptasqan aýyr ahýalǵa narazylyq bildirip, Memleket basshysynan jaǵdaidy baqylaýǵa alýdy surap, taǵy da Ashyq hat jazdy. Onda ne deidi?
"Kino óndirisine jaýapty oryndarda bul salaǵa qatysy joq bógde adamdar otyr, jemqorlyq jailaǵan kinoǵa bólingen milliardtaǵan teńge talan-tarajǵa salynýda. Bul saladaǵy degradatsiiany toqtatpasa, jaǵdai qiyndaityn túri bar. Mádeniet ministrligi qazaq kinosyndaǵy jaǵdaidy rettemek túgili, basyn alyp qashyp otyr" - deidi belgili óner tarlandary.
Ashynǵan Ashyq hattar Prezidentke qaita-qaita jazylyp jatsa da, Úkimet úndemei otyra berýge úirengen shyǵar, al halyq ókili bolǵandyqtan halyq narazylyǵyn parlamentte kóterý bizdiń negizgi mindetimiz", - dedi depýtat.
Qazybek Isa "Qazaqfilmge" qatysty máseleni kóterdi.
"Mádeniet ministrligi ózderiniń qatelikterinen shyqqan daýdy tezirek sheshý ornyna, Prezidentke talai úndeý jasalyp jatsa da, sońǵy úndeýden beri on kúnnen assa da, ministr túgili, ministrliktiń bir ókili de "Qazaqfilmge" bas suqpaǵan áli... Bul Mádenietti qoldaýǵa basa nazar aýdaryp otyrǵan Prezident Toqaevtyń Ádiletti Qazaqstan saiasatyna qarsy jasalyp otyrǵan sabotaj emes pe?!.
Hatta jazylǵandai, "Qazaqfilm" kinostýdiiasynda da, Ulttyq kinony qoldaý ortalyǵynda – birde-bir kino salasynyń mamany joq. Bul "aýrýhanada bir de bir dáriger joq" degenmen birdei sumdyq jaǵdai emes pe?! Sonda biz Ulttyq kinomyzdyń taǵdyryn kimderdiń qolyna tapsyryp otyrmyz?!" - dep ashyndy ol.
"Aqjol" partiiasynyń múshesi "Qazaqfilmdi" qolmen qurtyp jatyrmyz" degen pikirde.
"Ekinshi dúniejúzilik soǵys kezinde Úkimet tóraǵasy N.Ońdasynov ashqan "Qazaqfilmdi" beibit kezde biz óz qolymyzben qurtý ústindemiz.
"Mádenietti qorǵap qalý úshin soǵysyp jatyrmyz" degen eken danyshpan Cherchill soǵystyń kezinde. Al qazir qazaq mádeniet qairatkerleri beibit kezeńde mádenietimizdi qorǵap qalý úshin kúresip jatyr? Kimnen qorǵaý úshin kúresýde? Ashyq hattardyń ashyq jazýynsha Mádenietimizdi mádenietten habarsyz mádeniet basshylarynan qorǵaý kerek!
Sonda ǵana Ádiletti Qazaqstanda ómir súrip jatqanymyzǵa el sene bastaidy.
Úkimet bul máselege shuǵyl aralasyp, jaǵdaidy turaqtandyrýy tiis!" - dedi ol.
Aita keteiik, "Qazaqfilm" tóńireginde daý jii shyǵady. Buǵan deiin animatsiia bóliminiń birneshe qyzmetkeri 7 ai boiy jalaqy almaǵanyn, "Altyn adam" jobasy úshin de aqy almaǵanyn, Úkimet bekitken 500 million teńgeniń jobasy bastalmaǵanyn aityp shaǵymdandy.
Artynsha Azamat Satybaldy "Qazaqfilm" prezidenti qyzmetinen ketti.
