Jaqynda Ǵylym jáne joǵary bilim ministrligi Til saiasaty komitetiniń qoldaýymen qazaq tilin úiretýge arnalǵan Steppe Rider jáne Steppe Games oiyndary qoldanysqa engizildi. Alaida atalǵan jobalardyń sapasyna qatysty qoǵamda túrli syn pikir aityla bastady, dep habarlaidy Dalanews.kz.
Steppe Rider oiyny týraly málimet
Steppe Rider oiyny 6–25 jas aralyǵyndaǵy paidalanýshylarǵa qazaq tiliniń A1 jáne A2 deńgeilerin úiretýge, sondai-aq ulttyq bolmysty dáripteitin mazmundy ári sapaly oiyn ortasyn qalyptastyrýǵa baǵyttalǵan.
Joba kompiýterlik jáne mobildi nusqada usynylyp, qazaq tilin innovatsiialyq formatta meńgerýge arnalǵan jańa qural retinde tanystyryldy.
Oiynnyń barlyq fýnktsionaldyq múmkindikteri Astana qalasyndaǵy №104 mekteptiń oqýshylarynyń qatysýymen testilengen. Ázirleýshilerdiń málimetinshe, paidalanýshylardan alynǵan keri bailanys negizinde joba jetildirilgen.
Beta-testileýge qatysýshylar oiynnyń grafikasyn, dinamikasyn jáne mazmundyq tutastyǵyn joǵary baǵalaǵan.
Jobany iske asyrýǵa 20-dan astam maman, iaǵni baǵdarlamashylar, dizainerler, testileýshiler, derekter bazasynyń sarapshylary jáne pedagog-ádiskerler tartylǵan. Oqý mazmunynyń bilim berý standarttaryna sáikestigi qamtamasyz etilgeni habarlandy.
Steppe Games qosymshasy
Sonymen qatar qazaq tilin úirenýge arnalǵan Steppe Games mobildi qosymshasynyń resmi túrde qoljetimdi bolǵany belgili boldy. Qosymshany App Store jáne Google Play platformalarynan tegin júkteýge bolady.
Ázirleýshilerdiń aitýynsha, oiyn formatynda paidalanýshylar qazaq tilin úirenip qana qoimai, ulttyq mádeniet pen dástúrler, halyq oiyndarymen de tanysa alady. Qosymsha 6 jastan bastap, til deńgeiine qaramastan barlyq qoldanýshyǵa arnalǵan.
Dialogtar, siýjetter men keiipkerler til úirenýdi qyzyqty mádeni orta arqyly jeńildetýge baǵyttalǵan. Qosymshanyń múmkindikteri de №104 mektep oqýshylarynyń qatysýymen synaqtan ótken.
Jýrnalist pikiri
Alaida joba qoǵamda birjaqty qabyldana qoiǵan joq. Jýrnalist Ivan Strijakov Steppe Rider oiynyna qatysty syni pikir bildirdi.
Onyń aitýynsha, qazaq tilin úiretý ideiasy oryndy bolǵanymen, oiynnyń tehnikalyq oryndalýy men basqarý júiesinde kemshilikter bar. Sondai-aq jýrnalist jobaǵa shamamen jarty million dollar jumsalǵanyn, alaida qosymshany júktegender sany tym az ekenin atap ótti.
“Ideiasy jaqsy, biraq iske asyrý jaǵy úlken suraq týdyrady. Oiyn durys jumys istemeidi, basqarýy túsiniksiz, kei tustarda qatyp qalady. Mundai jobany júktegender sany da óte az”, - dedi ol.
Jýrnalist naryqta buǵan deiin-aq tiimdi ári sapaly til úiretý qosymshalary bar ekenin aityp, biýdjet qarajatynyń tiimdi jumsalýyna qatysty suraq kóterdi.
