Eńbek jáne halyqty áleýmettik qorǵaý vıse-mınıstri Asqarbek Ertaev qaıtys bolǵan feldsher Uldana Myrzýannyń otbasyna qandaı tólemder berilýi múmkin ekenin aıtty, dep habarlaıdy Dalanews.kz.
Ertaevtyń aıtýynsha, qazir arnaıy komısıa oqıǵanyń barlyq mán-jaıyn anyqtap jatyr. Komısıa jumys berýshiniń jaýapkershiligin baǵalap, tergeý aktisin ázirleıdi. Qandaı tólemder taǵaıyndalatyny sol qujattarǵa súıenip sheshiledi.
Vıse-mınıstr keltirgen málimetke qaraǵanda, marqumnyń otbasy tómendegi áleýmettik qoldaýlarǵa úmit arta alady:
- eger artynda balasy qalsa — asyraýshysynan aırylý boıynsha járdemaqy;
- qyzmetker úshin mindetti aýdarymdar jasalǵan bolsa — jerleý járdemaqysy (95 AEK);
- eńbek nemese turmystyq jaraqatqa qatysty saqtandyrý kelisimi bolǵan jaǵdaıda — saqtandyrý tólemderi.
Eske salaıyq, kúni keshe Astanada basyna kondısıoner qulap jaralanǵan feldsher qaıtys bolǵany habarlandy.
Astanada toǵyz qabatty turǵyn úıdiń syrtqy kirpish qaptamasy opyrylyp túsip, úsh adam zardap shekken. Ári qaraı olarǵa kómekke kelgen eki jedel járdem qyzmetkeri de aýyr jaraqat aldy. Feldsherdiń basyna bıikten kondısıoner qulap, bári jansaqtaý bóliminen bir-aq shyqty.
Ótken senbide qannen-qapersiz ketip bara jatqan apaly-sińlilerdiń basyna turǵyn úıdiń qasbeti qulaǵan. Aýyr jaraqat alǵan ekeý dereý aǵasyna qońyraý shalyp kómekke shaqyrady.
Artynsha jan ushyra jetip kelgen er adam da sapasyz salynǵan qurylystan zardap shekken. Eki jedel járdem qyzmetkerin qosqanda, jalpy sany bes adam aýrýhanaǵa jetkizildi.
Naýqastardyń jaqyndary tótenshe jaǵdaı qyzmetkerleri der kezinde kelmedi dep otyr. Alaıda qutqarýshylar bul aqparatty joqqa shyǵardy.
Polıseıler "Sapasyz salynǵan qurylys" baby boıynsha tergeý bastap, oqıǵanyń mán-jaıyn anyqtaýǵa kiristi.
