Buryn asa iri kólemde urlyq jáne aqshany jylystatqany úshin sottalǵan qazaqstandyq biznesmen Qairat Boranbaev shartty túrde merziminen buryn bosatýdy surap ótinish túsirdi, dep habarlaidy Dalanews.kz.
Eske salsaq, 2023 jyldyń 31 naýryzynda sot Qairat Boranbaevty Qylmystyq kodekstiń birneshe baby boiynsha kináli dep tanyǵan bolatyn: qylmys jasaýǵa járdemdesý (28-bap, 5-bólik), asa iri kólemde bótenniń múlkin urlaý (189-bap, 4-bólik, 2-tarmaq), sondai-aq qylmystyq jolmen tabylǵan kiristerdi toppen zańdastyrý (218-bap, 3-bólik, 3-tarmaq). Osy aiyptardyń jiyntyǵy boiynsha ol segiz jylǵa bas bostandyǵynan aiyryldy.
Alaida maýsym aiynyń sońynda úkimniń kúshi joiylyp, is apelliatsiialyq tártipte, biraq birinshi instantsiia erejeleri boiynsha qaita qaraýǵa jiberildi.
Osydan keiin qyrkúiek aiynda apelliatsiia qorytyndysy boiynsha Boranbaev qaitadan kináli dep tanylyp, alty jylǵa bas bostandyǵynan aiyrý jazasy taǵaiyndaldy.
2023 jylǵy 6 qarashada IIM Qylmystyq-atqarý júiesi komiteti Qairat Boranbaevtyń jazasyn aýystyrýǵa bailanysty qylmystyq-atqarý júiesiniń mekemesinen bosatylǵanyn habarlady. Buǵan deiin biznesmen memleketke milliardtaǵan aqsha men ondaǵan biznes-aktivin ótkizgen.
Onyń ótelmegen bóligi bostandyqty shekteý jazasyna aýystyryldy. Ol turǵylyqty jerine óz betimen barý, probatsiia qyzmetine tirkelý jáne onyń baqylaýynda bolýǵa mindetteldi.
Boranbaevtyń shartty túrde merziminen buryn bosatý týraly ótinishine bailanysty sot otyrysy 2 qazanda Bostandyq aýdanynyń qylmystyq sotynda onlain-formatta ótti.
«Sot otyrysy barysynda sottalǵan óz ótinishin qaitaryp aldy, osyǵan bailanysty sot onyń ótinishin qaraýsyz qaldyrdy», – dedi Almaty qalalyq sotynyń baspasóz hatshysy.
Eske sala keteiik, biylǵy 20 maýsymda Qairat Boranbaevtyń aǵasy biznesmen Murat Boranbaev ustalǵany belgili boldy. Ony Almatydaǵy aqyly avtoturaqtarǵa qatysty qylmystyq istiń negizgi figýranty ári qylmysty uiymdastyrýshy dep ataidy. Memlekettik satyp alý saitynda Murat Boranbaevtyń 2017 jyly «Alan Parking» JShS basshysy bolǵany kórsetilgen.
Buǵan deiin aqyly avtoturaq operatory memleket menshiginde bolǵan.
Keiin Almaty ákimdigi «Almaty spetstehparking servis» kompaniiasynyń 70 paiyzy jáne «Alan Parking»-tiń 100 paiyzy qalanyń menshigine qaitarylǵanyn habarlady.
