Memleket basshysy Qasym-Jomart Toqaev Prezident Shavkat Mirziioevke qonaqjailyqpen qarsy alyp, búgingi beiresmi kezdesýdi uiymdastyrǵany úshin rizashylyǵyn bildirdi, dep habarlaidy Dalanews.kz
– Shyn máninde, qazirgi geosaiasi qubylmaly jaǵdaidy eskersek, bul saparymdy óte mańyzdy dep aitsaq, qate bolmas. Ózbek eli – Qazaqstan úshin senimdi strategiialyq seriktes. Biz osy sapar barysynda ózekti máseleler jóninde pikir almasamyz. Kún tártibinde ekijaqty qarym-qatynasymyz boiynsha birqatar asa mańyzdy másele bar. Alaida bizdiń aramyzda eshqandai túsinbeýshilik ia bolmasa kedergi joq. Qol qoiylǵan jobalar, josparlar birte-birte oryndalýda. Bizdiń Úkimet barlyq kelisimderdi buljytpai iske asyrý mindetin jaqsy túsinip otyr. Meniń baqylaýymmen tiisti jumysty atqaryp jatyr, – dedi Memleket basshysy.
Prezident 2,5 myń jyldan asa tarihy bar kieli Buhara shahary álemdik tarihi-mádeni muranyń ajyramas bóligi sanalatynyn atap ótti.
– Buhara – Shyǵystyń orta ǵasyrlardaǵy rýhani ári ziiatkerlik ortalyqtarynyń biri. Bul kóne shahar men qazaq halqynyń arasynda belgili-belgisiz bailanystar kóp. Qazaqtyń áigili oishyly Máshhúr Júsip Buharada ilim jiǵan. Ǵasyrlar boiy qazaqtyń kóptegen ziialylary Buharada bilim alyp, jergilikti medreselerde oqyǵan. Munda adamzattyń órkendeýine airyqsha áser etken kezeńder men uly órkeniettiń tynysyn sezinesiz. Búginde Buhara óziniń myńjyldyq dástúri men Jańa Ózbekstannyń qarqyndy damýyn úilestirip otyr. Qazirgi Buharany tamashalap, barlyq ǵimaratqa jappai aýqymdy jańǵyrtý jumystary júrgizilgenine kýá boldyq. Bul – óte úlken istiń nátijesi, eń bastysy, uly tarihi muraǵa memleket tarapynan jasalǵan qamqorlyqtyń kórinisi, – dedi Memleket basshysy.
Prezident tarihi tyǵyz bailanystar Qazaqstan men Ózbekstan arasyndaǵy shynaiy strategiialyq seriktestik pen odaqtastyqtyń myzǵymas irgetasy ekenin eske saldy.
– Ekijaqty qarym-qatynasymyzdyń buryn-sońdy bolmaǵan joǵary deńgeige kóterilýine, qurmetti Shavkat Miromonovich, Sizdiń qosqan úlesińiz zor. Qazaqstan eń jaqyn kórshi ári odaqtas el retinde Sizdiń parasatty basshylyǵyńyzben júrgizilip jatqan aýqymdy saiasi jáne ekonomikalyq ózgeristerdi tolyq qoldaidy. Ózińiz belgilegen strategiialyq baǵdar arqyly halqyńyzdyń ál-aýqaty udaiy jaqsaryp, iri infraqurylymdyq jáne áleýmettik jobalar iske asyrylýda. Bul jetekshi qarjy institýttarynyń reitinginde oń baǵalanyp, elińizdiń halyqaralyq arenadaǵy bedeli artyp keledi. Sizdiń ulttyq múddeni kózdeitin dáiekti saiasatyńyz Ózbekstannyń, sondai-aq tutas aimaqtyń odan ári ósip-órkendeýine yqpal etedi dep senemin, – dedi Qasym-Jomart Toqaev.
Prezident Qazaqstanda jańa Konstitýtsiia qabyldanýyna bailanysty Ózbekstan kóshbasshysynyń quttyqtaý joldaǵanyna alǵys aitty. Prezident osy tarihi oqiǵa kezinde shet memleketter basshylary arasynan Shavkat Mirziioev alǵashqy bolyp quttyqtaǵanyn jetkizdi.
Memleket basshysy Ózbekstan Prezidentiniń «Taza aýa» bastamasyna qoldaý bildirip, bul joba Qazaqstannyń iri qalalary úshin de ózekti ekenine toqtaldy.
– Sizdiń taza aýaǵa qatysty bastamańyzdy quptaimyn. Tashkenttegi ekologiialyq jaǵdaiǵa alańdaýshylyq bildirýińizdi túsinemin. Bizdiń Almaty qalasyndaǵy ahýal da tym kúrdeli. Ókinishke qarai, Almaty álemdegi aýasy lastanǵan iri qalalar qatarynda tur. Sondyqtan shuǵyl sharalar qabyldaý qajet. Eger Siz qarsy bolmasańyz, «Taza aýa» bastamasyn birlesip iske asyrýdy usynamyz. Prezidentter uiytqy bolǵan bul jobany úkimetterimiz júzege asyrady. Jurtshylyq pen halyqaralyq qoǵamdastyq muny qýattaidy dep sanaimyn. Shyn máninde, bul bastama aiasynda kóp is atqarýǵa bolady. Osy arqyly jergilikti bilik pen kásipkerler ekologiiany qorǵaýda, tabiǵatty aialaýda jaýapkershilik júgin jete sezinedi, – dedi Qasym-Jomart Toqaev.
Ózbekstan Prezidenti Buharadaǵy búgingi júzdesýdiń eki el arasyndaǵy san qyrly bailanystardy keńeitýde mańyzy zor dep paiymdaidy.
– Sizdiń bul saparyńyz ǵasyrlardan tamyr tartatyn qos halyq arasyndaǵy dostyqty, tyǵyz baýyrlastyqty kórsetedi, sondai-aq strategiialyq seriktestik pen odaqtastyq qarym-qatynastyń udaiy nyǵaiyp kele jatqanyna dálel. Ashyq ári riiasyz kelissózder yntymaqtastyǵymyzdyń mazmunyn baiyta túsip, naqty nátijelerge qol jetkizýge, óńirdegi ózara yqpaldastyq aiasyn odan ári keńeitýge negiz bolatynyna senimdimin, – dedi Shavkat Mirziioev.
Ol ózbek halqynyń eń jaqyn kórshi jáne odaqtas retinde Qasym-Jomart Toqaevtyń Ádiletti Qazaqstan qurý jolyndaǵy tiimdi reformalaryna shynaiy qoldaý bildiretinin jetkizdi.
– Álemdegi kúrdeli ahýalǵa qaramastan, elińizdiń ekonomika kólemi 300 milliard dollardan asty. Shikizattyq emes sektor jandanyp, ishki jalpy ónimde shaǵyn jáne orta kásipkerliktiń úles salmaǵy 40 paiyzǵa jýyqtady. Siz memleketti tsifrlandyrý isine erekshe mán beresiz. Biyl Qazaqstanda Tsifrlandyrý jáne jasandy intellekt jyly dep jariialadyńyz. Elińizdiń jahandyq keńistiktegi abyroiy artyp keledi. Sizdiń basshylyǵyńyzben Qazaqstan halqynyń múddesine negizdelgen kópvektorly syrtqy saiasat tabysty júzege asyrylyp jatyr. Siz kótergen halyqaralyq bastamalar keńinen qoldaý taýyp otyr. Bul Sizdiń aimaqtyq jáne álemdik problemalardy sheshý isindegi kórnekti saiasi qairatker ekenińizdi kórsetedi. National Interest basylymyna jariialanǵan maqalańyzdy erekshe yqylaspen oqydym. Qazirgi halyqaralyq ahýalda pragmatizmniń, ashyqtyqtyń jáne shynaiylyqtyń róli artty degen oiyńyzben tolyq kelisemin. Ekonomikalyq jańǵyrý máselesine tereń úńiletinińizdi atap ótkim keledi. Investitsiia men ornyqty damý reformalaryn ushtastyrýdy jekelegen bastama retinde qarastyrmai, tutas strategiiaǵa ainaldyrdyńyz. Muny erekshe baǵalaimyn. Biz Sizdiń baýyrlas halyqtar arasyndaǵy tatý kórshilik qarym-qatynasty, strategiialyq seriktestik pen odaqtastyqty nyǵaitýǵa qosqan úlesińizdi airyqsha qadirleimiz, – dedi Ózbekstan Prezidenti.
Kezdesýde taraptar ekonomikalyq seriktestikti keńeitý jónindegi strategiialyq baǵytty ustanatynyn rastady. Saýda men óndiris salalarynda naqty kórsetkishterge qol jetkizý úshin eki el úkimetteriniń yqpaldastyǵyn arttyrý týraly kelisim jasaldy. Isker ortany júieli túrde qoldaý men yntalandyrýdyń mańyzy atap ótildi.
Memleketter basshylary sirek kezdesetin metaldardy óndirý men óńdeý, kólik-tranzit, sý-energetika salalary jáne IT sektoryndaǵy yqpaldastyq máselelerin egjei-tegjeili talqylady. Sondai-aq mádeni-gýmanitarlyq bailanystardy nyǵaitý men týrizmdi damytý isine airyqsha mán berildi.
Kelissóz qorytyndysy boiynsha prezidentter eki el úkimetteri arasyndaǵy Saýda-ekonomikalyq yntymaqtastyqty odan ári damytý jónindegi jol kartasyn qabyldaýǵa ýaǵdalasty.
