Qyzylorda oblystyq perinataldyq ortalyǵynda 2026 jyldyń alǵashqy úshemi ómirge keldi, dep habarlaidy dalanews.kz.
27 naýryz kúni júktiliktiń 32 aptasynda dúniege kelgen sábilerge Hadiia, Dariia jáne Jániia esimderi berildi. Nárestelerdiń salmaqtary bastapqyda 1210, 1470 jáne 980 gramm bolǵan.
Shala týǵan úshemder eki ai boiy ana men bala ortalyǵynyń joǵary táýeldiliktegi nárestelerge arnalǵan arnaiy bólimshesinde dárigerlerdiń turaqty baqylaýynda em qabyldady. Zamanaýi meditsinalyq kómek pen mamandardyń bilikti jumysynyń nátijesinde sábilerdiń jaǵdaiy turaqtalyp, salmaqtary edáýir artty. Qazirgi tańda olardyń salmaqtary 2390, 3390 jáne 2060 grammǵa jetken.
Oblystyq densaýlyq saqtaý basqarmasynyń ana men bala densaýlyǵyn qorǵaý bóliminiń basshysy Aigúl Asylbekqyzy arnaiy baryp, jas ata-anany quttyqtap, basqarma atynan syilyqtar tabys etti.
Úshemderdiń anasy – 32 jastaǵy Bekbaýly Móldir, ákesi – 34 jastaǵy Berikbol Nursultan. Syrdariia aýdanyna qarasty Basaryq aýylynyń Baimanovtar áýleti buǵan deiin de eki balany tárbielep otyrǵan kópbalaly otbasy.
