Saiasattanýshy Dosym Sátbaev Eýraziialyq ekonomikalyq odaqtyń (EAEO) qazirgi jaǵdaiyna qatysty pikir bildirdi. Onyń aitýynsha, Qazaqstan keiingi ýaqytta odaq aiasynda birqatar qolaisyz jaǵdailarǵa tap bolǵan, dep habarlaidy dalanews.kz.
Sarapshy Resei prezidenti Vladimir Pýtinniń Qazaqstanǵa sońǵy eki jyldaǵy ekinshi memlekettik saparynyń astarynda tek ekonomikalyq emes, geosaiasi faktorlar da jatqanyn aitty.
“Ortalyq Aziia Resei–Qytai–Iran geosaiasi úshtaǵanynda strategiialyq mańyzǵa ie bolyp otyr. Resei keiingi jyldary birqatar odaqtastarynan aiyryldy. Sondyqtan Ortalyq Aziianyń mańyzy arta tústi”, – deidi Dosym Sátbaev.
Onyń pikirinshe, EAEO aiasynda ekonomikalyq yntymaqtastyq týraly kóp aitylǵanymen, Qazaqstan biyl birneshe jaǵymsyz jaǵdaimen betpe-bet kelgen.
Máselen, saiasattanýshy Reseidiń 1 mamyrdan bastap qazaqstandyq munaidyń “Drýjba” qubyry arqyly Germaniiaǵa tranzitin toqtatqanyn mysalǵa keltirdi.
“Bul sheshim qabyldanǵanda Qazaqstannyń ekonomikalyq múddesi eskerilgen joq”, – deidi ol.
Sondai-aq Sátbaev Reseidiń EAEO elderinen keletin taýarlarǵa baqylaýdy kúsheitý maqsatynda jetkizilimdi aldyn ala rastaý júiesin engizýdi josparlap otyrǵanyna nazar aýdardy.
“Is júzinde bul qazaqstandyq tasymaldaýshylar úshin júk jetkizý tetigin kúrdelendirip, shekaradaǵy kidirister qaýpin arttyrady. Al biz áli kúnge deiin EAEO aiasyndaǵy biryńǵai ekonomikalyq keńistik týraly aityp kelemiz”, – dedi sarapshy.
Onyń aitýynsha, Resei keiingi jyldary úshinshi elderden keletin taýarlardyń tranzitine qatysty túrli shekteýler men qosymsha tekserýlerdi jii engizip keledi. Bul óz kezeginde qazaqstandyq logistika jáne saýda kompaniialarynyń jumysyna áser etip jatyr.
“Kei jaǵdaida qazaqstandyq óndirýshiler Resei naryǵyna shyǵý úshin óz ónimderin qosymsha sertifikattaýǵa májbúr bolady”, – dedi ol.
Sarapshy Resei tarapynan qazaqstandyq aýyl sharýashylyǵy ónimderine qatysty fitosanitarlyq jáne veterinarlyq shekteýlerdiń de turaqty túrde engiziletinin atap ótti.
Dosym Sátbaev Ortalyq Aziia elderiniń EAEO-ǵa saqtyqpen qaraýynyń da sebebi bar ekenin aitty.
“Ózbekstan bastapqydan-aq EAEO-ny barlyq qatysýshynyń múddesin eskeretin ekonomikalyq birlestikten góri, Reseidiń róli basym geosaiasi joba retinde qabyldady. Sondyqtan tolyq múshelikke ótpei, baqylaýshy mártebesinde qaldy”, – deidi saiasattanýshy.
Sondai-aq ol Armeniianyń UQShU men EAEO-daǵy belsendiligin tómendetýi de osyǵan uqsas úrdis ekenin atap ótti.
“Armeniia qazir belgili bir dárejede Ózbekstan júrip ótken jolmen kele jatyr. Sebepteri ártúrli bolǵanymen, nátije uqsas bolýy múmkin”, – dedi Sátbaev.
Sarapshynyń pikirinshe, Resei úshin EAEO-nyń bedeli men tartymdylyǵyn saqtaý mańyzdy. Sondyqtan uiym aiasyndaǵy qazirgi úderister men múshe memleketterdiń ustanymy aldaǵy ýaqytta erekshe mánge ie bolady.
