«Astana» saiabaǵynda qazaq halqynyń tarihynda, mádenietinde jáne ulttyq taǵamdarynda erekshe oryn alatyn tary daqylyn ósirý dástúrin saqtaý men dáripteýge arnalǵan «Aqtóbe – tarynyń astanasy» gastrofestivali ótti, dep habarlaidy dalanews.kz.
Is-sharaǵa oblys ákimi Ashat Shaharov qatysyp, festivaldiń kórme alańdaryn aralap kórdi, qatysýshylarmen jáne qonaqtarmen júzdesti. Sondai-aq ulttyq dástúrlerdi saqtaý men óńirde gastronomiialyq týrizmdi damytýdyń mańyzdylyǵyna toqtaldy.
Aýqymdy sharaǵa qala turǵyndary men qonaqtary kóptep jinalyp, óńirdiń bai mádeni jáne gastronomiialyq murasyn tanytatyn jarqyn alańǵa ainaldy.
Festival qonaqtarynyń tarydan daiyndalǵan elýge jýyq taǵam túri usynylǵan kórme-jármeńke erekshe qyzyǵýshylyǵyn týdyrdy. Qatysýshylar ulttyq taǵamdardyń alýan túrimen tanysyp, shokoladty jent ázirleý boiynsha sheberlik sabaǵyna qatysyp, dástúrli baýyrsaq pen samaýrynnan quiylǵan shaidan dám tatty.
Kópshiliktiń nazary Áiteke bi aýdanynyń arnaiy alańyna tústi. Munda tary ósirý jáne óńdeý tarihyna arnalǵan eksponattar qoiylyp, dándi daqyldy dástúrli tásilmen daiyndaý úderisi kórsetildi. Kelýshiler ataqty taryshy Shyǵanaq Bersievtiń Qazaqstan aýyl sharýashylyǵyn damytýǵa qosqan úlesi týraly keńirek málimet alyp, osy daqylǵa qatysty ulttyq dástúrlerdiń erekshelikterimen tanysty.
Festival aýmaǵynda halyq sheberleriniń qolóner buiymdary kórmesi de uiymdastyryldy. Qonaqtar teriden, kiizden, aǵashtan jáne júnnen jasalǵan avtorlyq jumystardy tamashalap, zergerlik óner týyndylarymen tanysty jáne qolónershiler ótkizgen sheberlik sabaqtaryna qatysty.
Gastrofestival aiasyndaǵy mańyzdy is-sharalardyń biri aýyl sharýashylyǵy salasynyń mamandaryn, agronomdardy, qoǵam ókilderin jáne sarapshylardy biriktirgen «Aqtóbe – tarynyń astanasy» atty dóńgelek ústel boldy. Kezdesý barysynda tary ósirý dástúrin jańǵyrtý, onyń paidaly qasietteri, sondai-aq óńirdiń agrarlyq jáne gastronomiialyq áleýetin damytý perspektivalary talqylandy.
Gastrofestival ulttyq taǵamdardy nasihattaityn merekelik shara ǵana emes, mádeni murany dáripteýge, dástúrli ónimderge degen qyzyǵýshylyqty arttyrýǵa jáne tarihi jadyny saqtaýǵa baǵyttalǵan mańyzdy alańǵa ainaldy. Is-shara qazaq halqynyń tarihy men mádenietindegi tarynyń erekshe ornyn taǵy bir márte aiqyndap, Aqtóbe oblysynyń osy biregei daqyldy damytýdaǵy mańyzdy ortalyqtardyń biri ekenin kórsetti.
