Qaraǵandy jáne Pavlodar oblystarynyń shekara mańyndaǵy dala órtin sóndirý jumystary jalǵasyp jatyr. Ony jedel shtab úilestirýde, dep habarlaidy Dalanews.kz.
Órt aýmaǵy aýqymdy, al sóndirý protsesi qatty jel, taýly relef jáne órt oshaqtaryna jetý qiyndyqtarymen kúrdelenip otyr.
Órtti sóndirýge Qaraǵandy oblysynyń TJD jáne jergilikti atqarýshy organdarynyń 386 qyzmetkeri, 64 tehnika birligi, sondai-aq QR TJM men Qorǵanys ministrliginiń áýe kemeleri qatysýda.
Qarqaraly aýdanynyń ákimi Ádiljan Arǵynov áleýmettik jelilerde uiymdastyrylyp jatqan túrli kómek aktsiialary týraly eskertý jasady. Ol uiymdastyrylmaǵan kómek sharalary qaýip tóndirýi múmkin ekenin jáne qazirgi ýaqytta barlyq qajetti resýrstar bar ekenin aitty.
“Qazir áleýmettik jelilerde qarjy jinaý jáne kómek kórsetý týraly aqparat taralyp jatyr. Uiymdastyrylmaǵan kómek adam ómirine qaýip tóndirýi múmkin. Qazirgi ýaqytta barlyq qajetti kúshter men quraldar jetkilikti: sarbazdardyń tamaǵy, demalý oryndary, janar-jaǵarmai tolyq qamtamasyz etilgen”, – dep málimdedi ákim.
Eske salaiyq, Qaraǵandy jáne Pavlodar oblystaryndaǵy alapat dala órti 3 myń gektar aýmaqty sharpydy. Órt negizinen Qaraǵandy oblysynyń Qoiandy aýylynda qurǵaq shóptiń tutanýynan bastalǵan, keiin jeldiń áserinen Baianaýyl ulttyq parkiniń ormansyz aýmaǵyna taralǵan. Atalmysh jaǵdai barysynda tórt adam zardap shekti, onyń ishinde úsh órt sóndirýshi jáne bir jergilikti turǵyn kúiik alyp, olar Qaraǵandy qalasyna tikushaqpen jetkizildi.
Órtti sóndirý úshin 56 tehnika men 4 tikushaq jumyldyryldy. Sýdy Shalqarkól kólinen alyp, birneshe márte órt oshaqtaryna tókti. Jeltaý aýylynan 18 adam, onyń ishinde segiz bala evakýatsiialandy .
