قاراعاندى جانە پاۆلودار وبلىستارىنىڭ شەكارا ماڭىنداعى دالا ءورتىن ءسوندىرۋ جۇمىستارى جالعاسىپ جاتىر. ونى جەدەل شتاب ۇيلەستىرۋدە، دەپ حابارلايدى Dalanews.kz.
ءورت اۋماعى اۋقىمدى، ال ءسوندىرۋ پروسەسى قاتتى جەل، تاۋلى رەلەف جانە ءورت وشاقتارىنا جەتۋ قيىندىقتارىمەن كۇردەلەنىپ وتىر.
ءورتتى سوندىرۋگە قاراعاندى وبلىسىنىڭ تجد جانە جەرگىلىكتى اتقارۋشى ورگاندارىنىڭ 386 قىزمەتكەرى، 64 تەحنيكا بىرلىگى، سونداي-اق ق ر تجم مەن قورعانىس مينيسترلىگىنىڭ اۋە كەمەلەرى قاتىسۋدا.
قارقارالى اۋدانىنىڭ اكىمى ءادىلجان ارعىنوۆ الەۋمەتتىك جەلىلەردە ۇيىمداستىرىلىپ جاتقان ءتۇرلى كومەك اكسيالارى تۋرالى ەسكەرتۋ جاسادى. ول ۇيىمداستىرىلماعان كومەك شارالارى ءقاۋىپ ءتوندىرۋى مۇمكىن ەكەنىن جانە قازىرگى ۋاقىتتا بارلىق قاجەتتى رەسۋرستار بار ەكەنىن ايتتى.
“ءقازىر الەۋمەتتىك جەلىلەردە قارجى جيناۋ جانە كومەك كورسەتۋ تۋرالى اقپارات تارالىپ جاتىر. ۇيىمداستىرىلماعان كومەك ادام ومىرىنە ءقاۋىپ ءتوندىرۋى مۇمكىن. قازىرگى ۋاقىتتا بارلىق قاجەتتى كۇشتەر مەن قۇرالدار جەتكىلىكتى: ساربازداردىڭ تاماعى، دەمالۋ ورىندارى، جانار-جاعارماي تولىق قامتاماسىز ەتىلگەن”، – دەپ مالىمدەدى اكىم.
ەسكە سالايىق، قاراعاندى جانە پاۆلودار وبلىستارىنداعى الاپات دالا ءورتى 3 مىڭ گەكتار اۋماقتى شارپىدى. ءورت نەگىزىنەن قاراعاندى وبلىسىنىڭ قوياندى اۋىلىندا قۇرعاق ءشوپتىڭ تۇتانۋىنان باستالعان، كەيىن جەلدىڭ اسەرىنەن باياناۋىل ۇلتتىق پاركىنىڭ ورمانسىز اۋماعىنا تارالعان. اتالمىش جاعداي بارىسىندا ءتورت ادام زارداپ شەكتى، ونىڭ ىشىندە ءۇش ءورت ءسوندىرۋشى جانە ءبىر جەرگىلىكتى تۇرعىن كۇيىك الىپ، ولار قاراعاندى قالاسىنا تىكۇشاقپەن جەتكىزىلدى.
ءورتتى ءسوندىرۋ ءۇشىن 56 تەحنيكا مەن 4 تىكۇشاق جۇمىلدىرىلدى. سۋدى شالقاركول كولىنەن الىپ، بىرنەشە مارتە ءورت وشاقتارىنا توكتى. جەلتاۋ اۋىلىنان 18 ادام، ونىڭ ىشىندە سەگىز بالا ەۆاكۋاسيالاندى .
