Qarqaraly aýdandyq aýrýhanasynan shý shyqty. Bir jaǵynan aýrýhanadaǵy 100 million teńge biýdjet qarjysynyń qoldy bolǵany anyqtalyp jatsa, ekinshi jaǵynan osy mekemede biýrokratiiasyz, shuǵyl túrde patsientke meditsinalyq kómek kórsetken qyzmetker jumystan zańsyz qýylyp otyr dep habarlaidy Dalanews jergilikti msu.city paraqshasyna siltep.
Jumystan qýylǵan jas maman Mádi Mahanov bir otbasynyń jalǵyz asyraýshysy.
Ájesi, zeinetker Baian Qamzina úshinshi toptaǵy múgedek, eki aiaǵyn basa almaidy, baldaqpen júretinin aityp otyr. Joldasy birinshi toptaǵy múgedek, qos janarynan aiyrylǵan. Nemeresiniń jumystan qýylýy otbasynyń áleýmettik jaǵdaiyn kúrt nasharlatyp jibergen.
"Aýrýhanamyzda ádildik te, tártip te joq. Basshylyq ádiletsizdikke jol berip otyr.
Nemeremiz Mádi patsienttiń jaǵdaiy nashar bolǵan soń qujat toltyrmai-aq kómek kórsetkeni úshin jumystan qýyldy. Bul qandai tártip? Densaýlyǵy jaqsy, diplomy bar jas mamandy zańsyz jumystan shyǵaryp jibergen basshy Mýsin esimdi azamattyń ózi direktor mindetin ýaqytsha ǵana atqaryp otyr.
Qyzmeti tolyq bekimei turyp, adam taǵdyryn sheshýge kim quqyq berdi?" – deidi ashynǵan zeinetker Baian Qamzina.
Ol osy máseleni aityp, birneshe márte bilik organdarynyń tabaldyryǵyn tozdyrǵan. Alaida onyń shaǵymyna eshkim mán bermegen. Oblys ákimdigi de qabyldaýdan bas tartqan.
"Prezidenttiń aldyna barýǵa daiynmyn, biraq onda da eshkim qabyldamaitynyn bilemin. Aǵa-kókemiz joq, qarapaiym otbasy bolǵandyqtan, daýysymyzdy eshkim estimeidi. Qaraǵandy oblysynyń ákimine úndeý jasap, osy jaǵdaidy sheship berýdi suraimyn. Jas mamandy dalada qaldyrǵan basshylyqqa shara qoldanyńyzdar. Biz endi kimge baramyz?" – dep ashynady Baian Qamzina.
Osy rette, aýdandyq aýrýhanada biýdjetten 100 million teńge jymqyrylǵany týraly jaǵdai nazar aýdartady.
"Naýqastyń ómirin birinshi orynǵa qoiǵany úshin mamandy jumystan qýý aqylǵa siia ma? Milliondaǵan qarjyny urlaǵandarǵa nege shara qoldanylmaidy?
Qarqaraly aýrýhanasyndaǵy bylyqqa jergilikti biliktiń únsiz qalýy biýrokratiianyń adam ómirinen joǵary turǵanyn kórsetkendei. Ázirge Baian apanyń úndeýi jaýapsyz qalyp otyr", - dep jazady msu.city.
