قارقارالى اۋداندىق اۋرۋحاناسىنان شۋ شىقتى. ءبىر جاعىنان اۋرۋحاناداعى 100 ميلليون تەڭگە بيۋدجەت قارجىسىنىڭ قولدى بولعانى انىقتالىپ جاتسا، ەكىنشى جاعىنان وسى مەكەمەدە بيۋروكراتياسىز، شۇعىل تۇردە پاسيەنتكە مەديسينالىق كومەك كورسەتكەن قىزمەتكەر جۇمىستان زاڭسىز قۋىلىپ وتىر دەپ حابارلايدى Dalanews جەرگىلىكتى msu.city پاراقشاسىنا سىلتەپ.
جۇمىستان قۋىلعان جاس مامان ءمادي ماحانوۆ ءبىر وتباسىنىڭ جالعىز اسىراۋشىسى.
اجەسى، زەينەتكەر بايان قامزينا ءۇشىنشى توپتاعى مۇگەدەك، ەكى اياعىن باسا المايدى، بالداقپەن جۇرەتىنىن ايتىپ وتىر. جولداسى ءبىرىنشى توپتاعى مۇگەدەك، قوس جانارىنان ايىرىلعان. نەمەرەسىنىڭ جۇمىستان قۋىلۋى وتباسىنىڭ الەۋمەتتىك جاعدايىن كۇرت ناشارلاتىپ جىبەرگەن.
"اۋرۋحانامىزدا ادىلدىك تە، ءتارتىپ تە جوق. باسشىلىق ادىلەتسىزدىككە جول بەرىپ وتىر.
نەمەرەمىز ءمادي پاسيەنتتىڭ جاعدايى ناشار بولعان سوڭ قۇجات تولتىرماي-اق كومەك كورسەتكەنى ءۇشىن جۇمىستان قۋىلدى. بۇل قانداي ءتارتىپ؟ دەنساۋلىعى جاقسى، ديپلومى بار جاس ماماندى زاڭسىز جۇمىستان شىعارىپ جىبەرگەن باسشى مۋسين ەسىمدى ازاماتتىڭ ءوزى ديرەكتور مىندەتىن ۋاقىتشا عانا اتقارىپ وتىر.
قىزمەتى تولىق بەكىمەي تۇرىپ، ادام تاعدىرىن شەشۋگە كىم قۇقىق بەردى؟" – دەيدى اشىنعان زەينەتكەر بايان قامزينا.
ول وسى ماسەلەنى ايتىپ، بىرنەشە مارتە بيلىك ورگاندارىنىڭ تابالدىرىعىن توزدىرعان. الايدا ونىڭ شاعىمىنا ەشكىم ءمان بەرمەگەن. وبلىس اكىمدىگى دە قابىلداۋدان باس تارتقان.
"پرەزيدەنتتىڭ الدىنا بارۋعا دايىنمىن، ءبىراق وندا دا ەشكىم قابىلدامايتىنىن بىلەمىن. اعا-كوكەمىز جوق، قاراپايىم وتباسى بولعاندىقتان، داۋىسىمىزدى ەشكىم ەستىمەيدى. قاراعاندى وبلىسىنىڭ اكىمىنە ۇندەۋ جاساپ، وسى جاعدايدى شەشىپ بەرۋدى سۇرايمىن. جاس ماماندى دالادا قالدىرعان باسشىلىققا شارا قولدانىڭىزدار. ءبىز ەندى كىمگە بارامىز؟" – دەپ اشىنادى بايان قامزينا.
وسى رەتتە، اۋداندىق اۋرۋحانادا بيۋدجەتتەن 100 ميلليون تەڭگە جىمقىرىلعانى تۋرالى جاعداي نازار اۋدارتادى.
"ناۋقاستىڭ ءومىرىن ءبىرىنشى ورىنعا قويعانى ءۇشىن ماماندى جۇمىستان قۋۋ اقىلعا سيا ما؟ ميلليونداعان قارجىنى ۇرلاعاندارعا نەگە شارا قولدانىلمايدى؟
قارقارالى اۋرۋحاناسىنداعى بىلىققا جەرگىلىكتى بيلىكتىڭ ءۇنسىز قالۋى بيۋروكراتيانىڭ ادام ومىرىنەن جوعارى تۇرعانىن كورسەتكەندەي. ازىرگە بايان اپانىڭ ۇندەۋى جاۋاپسىز قالىپ وتىر"، - دەپ جازادى msu.city.
