Qaraǵandyda politsiia esirtki óndiretin jasyryn zerthanany áshkereledi, dep habarlaidy Dalanews.kz.
5 qarasha kúni politsiia departamenti esirtki qylmysyna qarsy is-qimyl basqarmasynyń qyzmetkerleri oblystyq prokýratýranyń kómegimen Qaraǵandy qalasynyń Sortirovka kentinde keń aýqymdy arnaiy operatsiia ótkizdi.
Operatsiia barysynda jasy 28 ben 30 aralyǵyndaǵy eki oblys turǵyny sintetikalyq esirtki óndirýge arnalǵan jasyryn zerthana uiymdastyrdy degen kúdikpen ustaldy.
Tintý kezinde tártip saqshylary jaldamaly úiden bir tonnadan astam prekýrsor men 52 keliden astam daiyn esirtki zaty - Alfa-PVP zatyn tárkiledi.
Sonymen qatar esirtki óndirýge arnalǵan qural-jabdyqtar: elektrondy tarazylar, aralastyrǵyshtar, keptirgishter, vakýýmdaǵyshtar, konteinerler jáne ózge de tehnikalyq qurylǵylar anyqtalyp, aiǵaq zat retinde alyndy.
"Operatsiia nátijesinde shamamen 173 myń doza sintetikalyq esirtkiniń qara naryqqa túsýiniń joly kesildi. Sondai-aq azamattar arasynan jańa “kýrerler” men jasyryn taratýshylardyń qylmystyq iske tartylýyna jol berilmedi", - dedi Qaraǵandy oblysy politsiia departamenti esirtki qylmysyna qarsy is-qimyl basqarmasynyń bastyǵy Ǵalymjan Bekbolatov.
Aldyn ala tergeý málimetterine sáikes, kúdiktiler úidi zerthana ashý maqsatynda jaldap, psihotroptyq zattardy kýratordyń nusqaýymen daiyndaǵan. Al eńbekaqylary kriptovaliýta túrinde tólenip otyrǵan. Atalǵan derek boiynsha qylmystyq is qozǵalyp, eki kúdikti ýaqytsha ustaý izoliatoryna qamaldy. Qazirgi ýaqytta sotqa deiingi tergeý amaldary júrgizilýde.
