قاراعاندىدا پوليسيا ەسىرتكى وندىرەتىن جاسىرىن زەرتحانانى اشكەرەلەدى، دەپ حابارلايدى Dalanews.kz.
5 قاراشا كۇنى پوليسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى وبلىستىق پروكۋراتۋرانىڭ كومەگىمەن قاراعاندى قالاسىنىڭ سورتيروۆكا كەنتىندە كەڭ اۋقىمدى ارنايى وپەراسيا وتكىزدى.
وپەراسيا بارىسىندا جاسى 28 بەن 30 ارالىعىنداعى ەكى وبلىس تۇرعىنى سينتەتيكالىق ەسىرتكى وندىرۋگە ارنالعان جاسىرىن زەرتحانا ۇيىمداستىردى دەگەن كۇدىكپەن ۇستالدى.
ءتىنتۋ كەزىندە ءتارتىپ ساقشىلارى جالدامالى ۇيدەن ءبىر توننادان استام پرەكۋرسور مەن 52 كەلىدەن استام دايىن ەسىرتكى زاتى - الفا-PVP زاتىن تاركىلەدى.
سونىمەن قاتار ەسىرتكى وندىرۋگە ارنالعان قۇرال-جابدىقتار: ەلەكتروندى تارازىلار، ارالاستىرعىشتار، كەپتىرگىشتەر، ۆاكۋۋمداعىشتار، كونتەينەرلەر جانە وزگە دە تەحنيكالىق قۇرىلعىلار انىقتالىپ، ايعاق زات رەتىندە الىندى.
"وپەراسيا ناتيجەسىندە شامامەن 173 مىڭ دوزا سينتەتيكالىق ەسىرتكىنىڭ قارا نارىققا ءتۇسۋىنىڭ جولى كەسىلدى. سونداي-اق ازاماتتار اراسىنان جاڭا “كۋرەرلەر” مەن جاسىرىن تاراتۋشىلاردىڭ قىلمىستىق ىسكە تارتىلۋىنا جول بەرىلمەدى"، - دەدى قاراعاندى وبلىسى پوليسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى عالىمجان بەكبولاتوۆ.
الدىن الا تەرگەۋ مالىمەتتەرىنە سايكەس، كۇدىكتىلەر ءۇيدى زەرتحانا اشۋ ماقساتىندا جالداپ، پسيحوتروپتىق زاتتاردى كۋراتوردىڭ نۇسقاۋىمەن دايىنداعان. ال ەڭبەكاقىلارى كريپتوۆاليۋتا تۇرىندە تولەنىپ وتىرعان. اتالعان دەرەك بويىنشا قىلمىستىق ءىس قوزعالىپ، ەكى كۇدىكتى ۋاقىتشا ۇستاۋ يزولياتورىنا قامالدى. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە.
