Óskemen titano-magnii kombinatynyń sheteldik qojaiyndary dividend alatyn boldy. Al bul zaýyt biyl mamyr aiynda sary ýly tútinimen búkil qalany tunshyqtyryp, eldiń narazylyǵyna ushyraǵan edi. Ekologtar ózderine qomaqty kólemde aiyppul da salǵan, dep habarlaidy Dalanews.kz.
Qazaqstan qor birjasynyń (KASE) resmi saityndaǵy aqparatqa sáikes, Óskemen titan-magnii kombinaty artyqshylyqqa ie aktsiialary úshin dividend beriletinin jariialady. Ár aktsiia iesi 500 teńgeden almaq. Jalpy tólenetin dividend somasy 54 million teńgege jýyqtaidy.
Kásiporynǵa ielik etetin alty sheteldik kompaniia bar. Onyń ishinde negizgi aktsioner – Belgiianyń Specialty Metals Holding Company kompaniiasy (úlesi – 44,74%). Qalǵan aktsiialar singapýrlyq New Asia Investment Group, Metacapital Investments, Metal Resource & Technology, New Metal Investments jáne Shveitsariianyń Kolur Holding AG kompaniialaryna tiesili.
Óskemendegi bul kásiporyn aviatsiia jáne basqa da mańyzdy salalar úshin titan quimalary men magnii óndiredi. Biraq sońǵy ýaqytta zaýyttyń aty ónim sapasymen emes, ekologiialyq bylyqtarmen jii shyǵyp júr.
Osy jyldyń mamyr aiynda kásiporynda apatty jaǵdai oryn alyp, atmosferaǵa ziiandy zattar tarady. Qalany qoiý sary tútin tumshalap, turǵyndar hlordyń ótkir iisinen tunshyǵyp, tynys alý qiyndaǵanyna shaǵymdanǵan. Al kombinat basshylyǵy «hlor mólsheri qalypty deńgeiden asqan joq» dep málimdep, ekologiialyq inspektorlardy tekseriske bastapqyda kirgizbei qoiǵan.
Aqyry zaýyt aýmaǵyna kirýge múmkindik alǵan ekologtar gaz tazartý qurylǵysyn paidalaný erejeleri óreskel buzylǵanyn anyqtady. Gaz qubyryn tazalaý kezinde oryn alǵan tehnologiialyq aqaýdan ziiandy zattar atmosferaǵa erkin taraǵan. Kombinatqa 24 million teńge aiyppul salyndy.
Degenmen, qala jurty zaýytqa kesilgen bul jazanyń tym jeńil ekenin aityp otyr. Ýly gazdyń zardabyn tartqan halyqqa ótemaqy tóleýdiń ornyna, sheteldik kompaniialar endi dividend arqyly óz paidasyn alyp ketpekshi. Bul jaǵdai halyqtyń narazylyǵyn odan ári kúsheitýi múmkin.
