Prezident qańtar oqiǵasyna qatysty mańyzdy derekterge toqtalyp, Almatyǵa shabýyl jasaǵan sodyrlardyń jumysshy atyn jamylyp kelgenin aitty. Ol óz sózinde: «Bul adamdar materialdyq qundylyqtarǵa qyzyqpaǵan. Olar ákimshilik ǵimarattarǵa jasalǵan shabýyldardy basqardy. Olar qylmystyq isterge, quqyq qorǵaý organdarynyń qyzmetkerlerine qatysty qujattarǵa qyzyǵýshylyq tanytty. Bul – muqiiat josparlanǵan áreket. Syrttan kelgen sodyrlardy tarta otyryp, basqynshylyq áreket jasaldy. Sodyrlardyń áýejaidy basyp alý áreketin uiymdastyrǵanyn baiqaǵan bolarsyzdar. Qazir tergeý nátijesi Ortalyq Aziianyń bir qalasynan kelgen azamattardyń áýejei arqyly ótýin qamtamasyz etý úshin basyp alynǵanyn kórsetip otyr. Olar – oqytylǵan jaýyngerler. Jumysshy atyn jamylyp, shekara arqyly qalaǵa kirip, operatsiiany basqarǵan», - dedi.
Sondai-aq, Memleket basshysy Almatydaǵy búlik kezinde oq atý týraly buiryqty memlekettiń qaýipsizdigi úshin bergenin jáne elge tartylǵan Ujymdyq qaýipsizdik týraly shart uiymynyń áskerin shaqyrǵany úshin eshkimniń aldynda qaryz bolyp qalmaǵandyǵyn túsindirip aitty. Óitkeni, búginde osy máselege qatysty el arasynda shyndyqqa janaspaityn túrli áńgimeler júr. Prezident bul jóninde «Biz qaryz bolyp qaldyq degen siiaqty qaýesetterge kelsek, ondai áńgime óte kóp aityldy. Men jaýapkershilikpen aitamyn, Vladimir Vladimirovich Pýtinmen «keiin esep aiyrysarmyz» degen maǵyndaǵy eshqandai áńgime bolǵan joq. Kreml tarapynan eshqandai aldyn ala shart ta bolǵan joq. Túptep kelgende, Resei - Qazaqstan úshin odaqtas memleket. 2013 jyly Ekaterinbýrg qalasynda tiisti kelisimge qol qoiylǵan», - dep, túiindedi.
Aitýynsha, atalmysh qujatta Resei men Qazaqstannyń odaqtastyq qatynasy týraly aitylady. «Elderimizdiń arasyndaǵy qatynas Almatydaǵy oqiǵaǵa deiin de árdaiym tyǵyz, konstrýktivti, shynaiy áriptestik sipatta bolǵan edi. Osy qatynas jalǵasa beredi. Men aqpannyń ortasyna qarai Resei Prezidentiniń shaqyrýymen Máskeýge saparmen baramyn jáne biz elderimizdiń arasyndaǵy uzaq merzimdi áriptestik týraly óte mańyzdy qujattarǵa qol qoiamyz», - dedi.
Sonymen qatar, Memleket basshysy Qasym-Jomart Toqaev Qazaqstannyń parlamenttik júiesin reformalaý boiynsha oilanyp júrgenin aitty. Bul jaiynda 28 qańtarda ótken «Nur Otan» partiiasynyń sezinde de aitqanyn jetkizdi. Osy oraida, Memleket basshysy Parlament Májilisinde ustamdy ári myqty birneshe partiianyń bolýy kerektigin jáne bul baǵytta saiasi mádenietti ósirý asa mańyzdy ekendigin atap ótti.
Odan bólek, Memleket basshysy Qasym-Jomart Toqaev elimizdegi sońǵy kadrlyq taǵaiyndaýlarǵa qatysty túsinik berdi. Prezident qyzmet etip júrgen kadrlardy tolyqtai jumysynan shettetý tájiribesine qarsy ekenin aitty. Kadrlardy biliktiligine, jumysty atqarý sapasyna qarai baǵalaý mańyzdy dep atap ótti. Bul rette, Memleket basshysy Úkimetti 100 paiyz aýystyryp, ózińdi revoliýtsioner retinde jariia etip, kópshiliktiń aldynda osyndai áreketter jasaýdy qoldamaitynyn jetkizdi. Degenmen, Prezident jumysynda jaýapkershiligi joqtary qyzmette júre bermeitinin jáne jumys barysynda talantty jáne bilimdi mamandar qarastyrylatynyn da atap ótti.
Sonymen qatar, Prezident sýdialarǵa qoiylatyn talap ózgeretinin jáne sýdialardy irikteýde qandai qasietterine basty nazar aýdarylatynyn málimdedi. Basty ólshem parasattylyq pen adaldyq bolýy shart ekendigin jetkizdi.
Memleket basshysy «Bolashaq» baǵdarlamasymen tehnikalyq mamandardy Reseide oqytý jónindegi máselege de toqtaldy. Onyń sebebi, Reseidegi tehnikalyq mamandardy daiyndaityn oqý oryndary sapasynyń joǵarylyǵy men tildik kederginiń oryn almaityndyǵynda ekendigin atap ótti. Árine, bul tusta Batysta oqyǵysy keletin jastarǵa esh kedergi jasalmaityndyǵy aityldy. Sonymen birge, Prezident Batystyń oqý ornynyń diplomynyń bolýy joǵary bilim kórsetkishi emestigin atap ótti. Bul jóninde Prezident: «Men batystyq bilimdi dáriptemes edim. Onda da óz problemalary bar jáne biz Batys ýniversitetteri de diplom shyǵaratyn keńselerge ainalyp jatqanyn bilemiz. Aqshany tóle de, biraz ýaqyttan keiin diplomdy ala ber, keibir jastarymyz muny paidalanyp júr», - dedi.
Sondai-aq, Qasym-Jomart Toqaev halyqtyń jaǵdaiyn kóterý maqsatynda shaǵyn jáne orta biznes úlesin arttyrý, olarǵa qoldaý kórsetý boiynsha tiisti sharalar qabyldanatynyn jetkizdi. Bul oraida, bankterden jeńildetilgen nesieler berý jumysy ońtailandyrylatyndyǵy aityldy. Óz kezeginde, bul shaǵyn jáne orta biznestiń damýyna erekshe serpin berip, el ekonomikasyn jańǵyrtýdyń negizi bolatyny anyq.
Jalpy, Prezidenttiń qoǵamda jii talqylanyp, kópshiliktiń kókeiinde júrgen mańyzdy saýaldarǵa bergen naqty ári tushymdy jaýaptary kópshiliktiń kóńiline senim uialatqany anyq.
Búginde elimiz qańtar oqiǵasy saldarynan oryn alǵan qiyndyqtardy sáttilikpen jeńip, jańarý kezeńine qadam basyp keledi.
Sondyqtan, dana halqymyz «Saýsaq birikpei, ine ilikpeidi» demekshi, barshamyz bir shańyraq iesindei judyryqsha jumylar bolsaq, elimizdi damýdyń jańa deńgeiine kóteretinimiz sózsiz.
Qairat BALABIEV , Túrkistan oblysynyń máslihat hatshysy
