Sherzat Bolatty óltirý isi boiynsha ótip jatqan sot protsesinde kámeletke tolmaǵan aiyptalýshy Dýman Ysqaqtan jaýap alyndy, dep habarlaidy Dalanews.kz.
Onyń aitýynsha, qaiǵyly oqiǵa bolǵan kúni Nurbol Toqtaýbaev oǵan habarlasyp, kólik júrgizip berýin suraǵan. Sebebi Toqtaýbaevtyń ózi ishimdik ishken eken.
“Nurbol “Darhan Áskentai dúkenge aqysyn tólep qoidy, baryp taǵy da suraiyq” dedi. Sóitip “Qamajai” dúkenine qaita bardyq”, — dedi Ysqaq.
Onyń aitýynsha, olar dúkenge jetkende Darhan Áskentai syrtta turǵan. Alaida ne bolyp jatqanyn naqty kórmegenin aitty.
“Dúken jaryǵynyń shaǵylysýynan eshteńe anyq kórinbedi. Adamdardyń bet-álpetin ajyrata almadym”, — deidi ol.
Sotta Ysqaqqa “Sherzat Bolattyń dostary agressiia kórsetti me?” degen suraq qoiyldy.
“Áńgime barysynda olar ózderin sál qatqyl ustady”, — dep jaýap berdi sottalýshy.
Memlekettik aiyptaýshy Dana Sársenbai aiyptalýshy Dýman Ysqaqtan tergeý kezinde bergen jaýabynda Shynasyldyń qolynan myltyq pen pyshaq kórgenin esine saldy.
“Pyshaqty súrtip jatqanyn kórdim, al myltyq tirelip turǵan. Pyshaqtyń qai jerin súrtip jatqanyn naqty bilmeimin, sabyn ǵoi deimin. Ne úshin súrtkenin bilmeimin”, - dep jaýap berdi ol.
