Pavlodar oblysynda erikti túrde kóship kelgen azamattarǵa arnalǵan memlekettik qarjyny jymqyrǵan sheneýnikterdiń alaiaqtyq áreketi áshkere boldy, dep habarlaidy Dalanews.kz.
Bul týraly oblystyq prokýratýra málimdedi. Olardyń dereginshe, memlekettik "Qýatty óńirler – el damýynyń draiveri" baǵdarlamasy aiasynda ońtústikten soltústikke kóship kelgen azamattarǵa baspana alý úshin memleketten ár otbasyna 4 million teńgege deiin qarjy qarastyrylǵan. Alaida jergilikti sheneýnikter osy baǵdarlamany óz paidalaryna sheship, biýdjettiń milliondaǵan qarjysyn qaltaǵa basqan.
Pavlodar oblysy boiynsha Eńbek mobildiligi ortalyǵyna qarasty Ýspen aýdanyndaǵy filial qyzmetkerleri ońtústikten kelgen azamattarǵa úidi arzan baǵamen taýyp berip, biraq satyp alý kelisimshartyna eki eselengen baǵany – shamamen 8 million teńgeni kórsetýdi mindettegen. Baǵa aiyrmashylyǵynan túsken aqshany kóship kelgen azamattar sheneýnikterge qaita berýi tiis bolǵan. Olar bul áreketti "baǵdarlama sharttaryna sai talap" retinde túsindirgen.
Osylaisha, memleket biýdjeti 144 million teńgege shyǵynǵa ushyraǵan. Qazirgi ýaqytta bul iske qatysty eki adam sottalǵan: biri bes jylǵa bas bostandyǵynan aiyrylsa, ekinshisi úsh jylǵa bostandyǵyn shekteý jazasyna kesilgen. Alaida sot úkimi áli zańdy kúshine engen joq.
Buǵan deiin soltústik aimaqtarǵa erikti kóshi-qon baǵdarlamasy turǵyndarǵa jumys pen baspana usynsa da, ońtústik turǵyndarynyń kópshiligi osy baǵdarlamaǵa senimsizdikpen qarap kelgen edi. Al osyndai áreketter baǵdarlamaǵa degen senimdi tipti tómendetip jiberýi múmkin.
