– 13 tamyzda Óskemen ákimi Tumabaev qyzmetinen ketetini jaıly aryz jazdy. Óskemen qalasy ákiminiń qyzmetinen ketýi QR Prezıdentiniń 2002 jyldyń 29 naýryzyndaǵy №828 jarlyqqa sáıkes keledi, – dep habarlady SHQO ákimdiginiń baspasóz qyzmeti.
Vedomstvo málimetinshe, qala ákiminiń orynbasary Býlavkına Olga Aleksandrovna SHQO oblys ortalyǵy ákiminiń mindetin ýaqytsha atqarady.
Munyń aldynda Shyǵys Qazaqstan oblysynyń ákimi Danıal Ahmetov Óskemen ákimi Qýat Tumabaevqa jumystan ketýdi usynǵan bolatyn.
«Menińshe, Qýat Tumabaevtyń osyndaı joǵary laýazymda otyrýǵa moraldyq quqyǵy joq. Men oǵan óz erkimen jumystan ketý týraly aryz jazýdy usyndym» degen edi Danıal Ahmetov.
Buǵan deıin Memlekettik qyzmet isteri jáne sybaılas jemqorlyqqa qarsy is-qımyl departamentiniń etıka jónindegi keńesi de Tumabaevtyń óz qyzmetine tolyqtaı sáıkes emestigin málimdegen bolatyn.
Esterińizge sala keteıik, Rıdder qalasy ákiminiń orynbasary Baýyrjan Qurmanbaev mas kúıinde kólik júrgizip, 19 jastaǵy azamatty qaǵyp óltirgen kezde Óskemen qalasynyń ákimi Qýat Tumabaev qasynda bolǵan.
Ári onyń oqıǵa ornynan sol kólikke otyryp qashyp ketkeni anyqtaldy.
Qoǵamda qyzý pikirtalas týdyrǵan osy oqys oqıǵadan soń Baýyrjan Qurmanbaev jábirlenýshi tarappen tatýlasyp, sottyń sheshimimen 1 jylǵa shartty jazaǵa kesildi. Al, bul proseske tek kýáger retinde qatysqan Qýat Tumabaev sottalmasa da, aqyry qyzmetimen qosh aıtysty.
