– 13 تامىزدا وسكەمەن اكىمى تۇمابايەۆ قىزمەتىنەن كەتەتىنى جايلى ارىز جازدى. وسكەمەن قالاسى اكىمىنىڭ قىزمەتىنەن كەتۋى ق ر پرەزيدەنتىنىڭ 2002 جىلدىڭ 29 ناۋرىزىنداعى №828 جارلىققا سايكەس كەلەدى، – دەپ حابارلادى شقو اكىمدىگىنىڭ باسپا ءسوز قىزمەتى.
ۆەدومستۆو مالىمەتىنشە، قالا اكىمىنىڭ ورىنباسارى بۋلاۆكينا ولگا الەكساندروۆنا شقو وبلىس ورتالىعى اكىمىنىڭ مىندەتىن ۋاقىتشا اتقارادى.
مۇنىڭ الدىندا شىعىس قازاقستان وبلىسىنىڭ اكىمى دانيال احمەتوۆ وسكەمەن اكىمى قۋات تۇمابايەۆقا جۇمىستان كەتۋدى ۇسىنعان بولاتىن.
«مەنىڭشە، قۋات تۇمابايەۆتىڭ وسىنداي جوعارى لاۋازىمدا وتىرۋعا مورالدىق قۇقىعى جوق. مەن وعان ءوز ەركىمەن جۇمىستان كەتۋ تۋرالى ارىز جازۋدى ۇسىندىم» دەگەن ەدى دانيال احمەتوۆ.
بۇعان دەيىن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ ەتيكا جونىندەگى كەڭەسى دە تۇمابايەۆتىڭ ءوز قىزمەتىنە تولىقتاي سايكەس ەمەستىگىن مالىمدەگەن بولاتىن.
ەستەرىڭىزگە سالا كەتەيىك، ريددەر قالاسى اكىمىنىڭ ورىنباسارى باۋىرجان قۇرمانبايەۆ ماس كۇيىندە كولىك جۇرگىزىپ، 19 جاستاعى ازاماتتى قاعىپ ولتىرگەن كەزدە وسكەمەن قالاسىنىڭ اكىمى قۋات تۇمابايەۆ قاسىندا بولعان.
ءارى ونىڭ وقيعا ورنىنان سول كولىككە وتىرىپ قاشىپ كەتكەنى انىقتالدى.
قوعامدا قىزۋ پىكىرتالاس تۋدىرعان وسى وقىس وقيعادان سوڭ باۋىرجان قۇرمانبايەۆ جابىرلەنۋشى تاراپپەن تاتۋلاسىپ، سوتتىڭ شەشىمىمەن 1 جىلعا شارتتى جازاعا كەسىلدى. ال، بۇل پروسەسكە تەك كۋاگەر رەتىندە قاتىسقان قۋات تۇمابايەۆ سوتتالماسا دا، اقىرى قىزمەتىمەن قوش ايتىستى.
