Qarjyger Arman Bataev Forte Bank aktsiialaryn baǵalaý ádistemesindegi sońǵy ózgeris minoritarlyq aktsionerlerden úlesterdi naryqtaǵydan áldeqaida tómen baǵamen májbúrli túrde satyp alýǵa daiyndyq bolýy múmkin dep boljaidy. Ol bul qadam bank sektoryndaǵy birigý turǵysyndaǵy iri operatsiialar aiasynda qarastyrylyp jatqanyn aitady, dep habarlaidy Dalanews.kz.
Qarjyger Arman Bataevtyń Telegram-daǵy Finmentor arnasynda bank aktsiiasynyń basym bóligine ie Bolat Ótemuratov baǵalaý erejelerindegi sońǵy ózgeristerdi paidalana otyryp, Forte Bank aktsiialaryn tolyqtai bir jerge shoǵyrlandyrýǵa daiyndalyp jatqanyn boljaidy. Al jańa ádis boiynsha satyp alý baǵasy naryqtyq baǵadan 4 esege tómendetilip otyr. Sarapshy osyǵan basa nazar aýdartady. Oǵan qaǵazdardy balanstyq quny boiynsha baǵalaý múmkindigi qosyldy.
Bul jańashyldyq baǵada aitarlyqtai aiyrmashylyǵyn týdyrady:
- balanstyq quny boiynsha baǵa: bir aktsiia úshin 5,11 teńge;
- sońǵy 30 kúndegi birjada tirkelgen ortasha naryqtyq baǵa: bir aktsiia úshin 18-19 teńge.
1 shildedegi jaǵdai boiynsha Bolat Ótemuratov Forte Bank aktsiialarynyń 91,1%-yna ielik etedi. Arman Bataev atap ótkendei, "Aktsionerlik qoǵamdar týraly" QR Zańynyń 25-1-babyna sáikes, jariia aktsionerdiń úlesi 95%-ǵa jetkende, ol qalǵan aktsiialardy barlyq minoritariilerden májbúrli túrde satýdy talap etýge zańdy quqyq alady.
Aita ketsek, bul áreketter bank sektoryndaǵy úlken ózgerister aiasynda júzege asyrylýda. Buǵan deiin Forte Bank qazaqstandyq Home Credit BANK-ty satyp alyp jatqany habarlanǵan. Ekonomist Ǵalym Qusaiynov Forbes Kazakhstan-ǵa bergen suqbatynda basqa bankti satyp alý jai ǵana ósim úshin emes, bolashaq, áldeqaida iri satylym úshin aktivti strategiialyq "bordaqylaý" bolatynyn aitqan edi. Onyń ústine, naryqta osy birigý protsesinen keiin Forte Bank-ti iri sheteldik oiynshy – majarlyq OTP Bank satyp alýy múmkin degen dolbar bar. Sondyqtan "sheteldik investorǵa satylýy múmkin" degen nusqany qarastyrsaq, onda 100% aktsiiany bir adamnyń qolyna shoǵyrlandyrý degen qisyndy oi. Bul mámile qurylymyn edáýir jeńildetedi jáne aktivti satyp alýshy úshin tartymdy etedi.
