Joǵary aýditorlyq palata “Ulttyq qor – balalarǵa” baǵdarlamasy boiynsha kámelet jasyna tolǵan qatysýshylarǵa tiesili qarajattyń basym bóligi paidalanylmai otyrǵanyn málimdedi. Olardyń dereginshe, 2025 jylǵy 1 qańtardaǵy jaǵdai boiynsha 2024 jyly 18 jasqa tolǵan qatysýshylarǵa eseptelgen 30,6 mln dollardyń 26 mln dollary nemese 84,9 paiyzy paidalanylmaǵan, dep habarlaidy dalanews.kz.
Qazaq Expert Club sarapshysy, qarjyger Venera Janalinanyń aitýynsha, bul úrdis tek bir jylmen shektelmeidi. Onyń sózinshe, 2023–2024 jyldary paidalanýǵa qoljetimdi bolǵan 106,2 mln dollardyń 74,6 mln dollary igerilmegen. Iaǵni qarajattyń shamamen 70 paiyzy óz ieleri tarapynan qoldanylmaǵan.
"Baǵdarlama aiasynda balalarǵa eseptelgen barlyq qarajat týraly emes, tek kámelet jasyna tolǵan qatysýshylar paidalana alatyn qarajat jóninde aityp otyrmyz", – dedi Venera Janalin.
Sarapshynyń pikirinshe, igerilmegen qarajat kóleminiń kóp bolýy baǵdarlamanyń tiimsizdigin kórsetpeidi. Aitýynsha, 18 jasqa tolǵan jastardyń bári birdei birden oqý ornyn tańdap, sheshim qabyldai bermeidi. Keibiri memlekettik grant ielense, endi biriniń jinaqtalǵan qarjysy turǵyn úi máselesin sheshýge jetkiliksiz bolýy múmkin.
"Qarajattyń paidalanylmai jatýy kóbine jastardyń jeke tańdaýymen bailanysty", – dedi qarjyger.
Sonymen qatar Venera Janalinanyń aitýynsha, kámelet jasyna tolǵannan keiin qarajattyń investitsiialyq tabys ákelýin toqtatýy nazar aýdarýdy qajet etedi. Onyń sózinshe, balalar 18 jasqa tolǵanǵa deiin bul qarjy Ulttyq qor quramynda investitsiialanyp, tabys ákeledi. Al arnaiy jinaq shotyna aýdarylǵan soń qarajat investitsiialyq ainalymnan shyǵyp qalady.
"Jastardyń bastapqy kapitaly retinde qarastyrylǵan qarajat birneshe jyl boiy paidalanylmai jatsa, onyń tabys ákelý múmkindigin saqtaý mańyzdy", – dedi ol.
Qarjygerdiń esebinshe, eger Ulttyq qordyń keiingi 18 jyldaǵy ortasha jyldyq tabys deńgeii saqtalsa, paidalanylmaǵan 26 mln dollar jyl saiyn shamamen 800 myń dollar investitsiialyq tabys ákelýi múmkin. Al igerilmegen qarajattyń jalpy kólemi 74,6 mln dollar bolǵan jaǵdaida, áleýetti tabys 2,2–2,3 mln dollarǵa deiin jetedi.
Degenmen sarapshy bul qarajatty memlekettik jobalardy qarjylandyrý kózi retinde qarastyrýǵa bolmaitynyn atap ótti. Onyń pikirinshe, bul qarjy naqty azamattarǵa tiesili bolǵandyqtan, kez kelgen sheshim olardyń múddesin eskerýi qajet.
"Eger paidalanylmaǵan qarajatty investitsiialaý týraly sheshim qabyldansa, qarajat naqty iesine bekitilip qalýy kerek. Sonymen qatar investitsiialyq saiasat barynsha qaýipsiz ári ashyq bolǵany jón", – dedi Venera Janalin.
Sarapshynyń sózinshe, Joǵary aýditorlyq palata kótergen másele oryndy bolǵanymen, baǵdarlamany jetildirý barysynda balalardyń bolashaqtaǵy qarjylyq múddesi basty orynda qalýy tiis.
