Qaraǵandyda bolǵan oqiǵa jurtshylyqtyń nazaryn aýdardy. Jergilikti turǵyn Alik Saǵyn hirýrgtiń salǵyrttyǵy saldarynan denesinde meditsinalyq ine qalyp qoiǵanyn málimdedi, dep habarlaidy Dalanews.kz.
eKaraganda.kz portalynyń málimetinshe, oqiǵa oblystyq klinikalyq aýrýhanada oryn alǵan. Saǵynnyń aitýynsha, 14 sáýir kúni oń jaq búiirindegi qatty aýyrsynýmen aýrýhanaǵa júgingen. Dárigerler oǵan aldyn ala "plevrit" diagnozyn qoiyp, shuǵyl ota taǵaiyndaǵan. Em alýshyny sózine súiensek, operatsiia toǵyz saǵatqa sozylǵan. Odan keiin ol ftiziatriia ortalyǵyna aýystyrylyp, qaita rentgen jasalǵan kezde ǵana oń jaq keýde tusynan bógde zat – meditsinalyq ine anyqtalǵan.
19 sáýirde dárigerler taǵy bir ota jasap, ineni alyp tastaýǵa tyrysqan. Alaida Saǵynnyń aitýynsha, bul aralasýdan keiin jaǵdaiy odan saiyn nasharlaǵan. Qazirgi tańda ol ambýlatorlyq em qabyldap jatyr.
"Meniń jaǵdaiym qiyn. Jumys istei almai júrmin. Dáriger bir ret te habarlasyp, jaǵdaiymdy suramady. Bári tym-tyrys. Osy oqiǵany nazardan tys qaldyrmasyn dep Densaýlyq saqtaý ministrligine úndeý joldaǵym keledi", – deidi Alik Saǵyn.
Qaraǵandy oblystyq densaýlyq saqtaý basqarmasy bul jaǵdaidy rastady. Vedomstvonyń málimdeýinshe, qyzmettik tergeý bastalǵan jáne tekserý nátijesine bailanysty tiisti sharalar qabyldanbaq.
"19 mamyr kúni patsient ambýlatorlyq emdelýge shyǵaryldy. Kliniko-rentgenologiialyq kórsetkishter oń nátije kórsetip otyr. Táýelsiz saraptamalyq komissiia otyrysynyń qorytyndysy boiynsha densaýlyqqa kelgen ziiannyń bar-joǵy anyqtalady", – delingen resmi habarlamada.
