قاراعاندىدا بولعان وقيعا جۇرتشىلىقتىڭ نازارىن اۋداردى. جەرگىلىكتى تۇرعىن اليك ساعىن حيرۋرگتىڭ سالعىرتتىعى سالدارىنان دەنەسىندە مەديسينالىق ينە قالىپ قويعانىن مالىمدەدى، دەپ حابارلايدى Dalanews.kz.

eKaraganda.kz پورتالىنىڭ مالىمەتىنشە، وقيعا وبلىستىق كلينيكالىق اۋرۋحانادا ورىن العان. ساعىننىڭ ايتۋىنشا، 14 ءساۋىر كۇنى وڭ جاق بۇيىرىندەگى قاتتى اۋىرسىنۋمەن اۋرۋحاناعا جۇگىنگەن. دارىگەرلەر وعان الدىن الا "پليەۆريت" دياگنوزىن قويىپ، شۇعىل وتا تاعايىنداعان. ەم الۋشىنى سوزىنە سۇيەنسەك، وپەراسيا توعىز ساعاتقا سوزىلعان. ودان كەيىن ول فتيزياتريا ورتالىعىنا اۋىستىرىلىپ، قايتا رەنتگەن جاسالعان كەزدە عانا وڭ جاق كەۋدە تۇسىنان بوگدە زات – مەديسينالىق ينە انىقتالعان.

19 ساۋىردە دارىگەرلەر تاعى ءبىر وتا جاساپ، ينەنى الىپ تاستاۋعا تىرىسقان. الايدا ساعىننىڭ ايتۋىنشا، بۇل ارالاسۋدان كەيىن جاعدايى ودان سايىن ناشارلاعان. قازىرگى تاڭدا ول امبۋلاتورلىق ەم قابىلداپ جاتىر.

"مەنىڭ جاعدايىم قيىن. جۇمىس ىستەي الماي ءجۇرمىن. دارىگەر ءبىر رەت تە حابارلاسىپ، جاعدايىمدى سۇرامادى. ءبارى تىم-تىرىس. وسى وقيعانى نازاردان تىس قالدىرماسىن دەپ دەنساۋلىق ساقتاۋ مينيسترلىگىنە ۇندەۋ جولداعىم كەلەدى"، – دەيدى اليك ساعىن.

قاراعاندى وبلىستىق دەنساۋلىق ساقتاۋ باسقارماسى بۇل جاعدايدى راستادى. ۆەدومستۆونىڭ مالىمدەۋىنشە، قىزمەتتىك تەرگەۋ باستالعان جانە تەكسەرۋ ناتيجەسىنە بايلانىستى ءتيىستى شارالار قابىلدانباق.

"19 مامىر كۇنى پاسيەنت امبۋلاتورلىق ەمدەلۋگە شىعارىلدى. كلينيكو-رەنتگەنولوگيالىق كورسەتكىشتەر وڭ ناتيجە كورسەتىپ وتىر. تاۋەلسىز ساراپتامالىق كوميسسيا وتىرىسىنىڭ قورىتىندىسى بويىنشا دەنساۋلىققا كەلگەن زياننىڭ بار-جوعى انىقتالادى"، – دەلىنگەن رەسمي حابارلامادا.